Jātaka

Catukkanipāta

Kokilavagga

7. Pīṭhajātaka

“Na te pīṭhamadāyimhā,
na pānaṃ napi bhojanaṃ;
Brahmacāri khamassu me,
etaṃ passāmi accayaṃ”.

“Nevābhisajjāmi na cāpi kuppe,
Na cāpi me appiyamāsi kiñci;
Athopi me āsi manovitakko,
Etādiso nūna kulassa dhammo”.

“Esasmākaṃ kule dhammo,
pitupitāmaho sadā;
Āsanaṃ udakaṃ pajjaṃ,
sabbetaṃ nipadāmase.

Esasmākaṃ kule dhammo,
pitupitāmaho sadā;
Sakkaccaṃ upatiṭṭhāma,
uttamaṃ viya ñātakan”ti.

Pīṭhajātakaṃ sattamaṃ.