Jātaka

Catukkanipāta

Cūḷa­kuṇāla­vagga

3. Kuntinījātaka

“Avasimha tavāgāre,
niccaṃ sakkatapūjitā;
Tvameva dānimakari,
handa rāja vajāmahaṃ”.

“Yo ve kate paṭikate,
kibbise paṭikibbise;
Evaṃ taṃ sammatī veraṃ,
vasa kuntini māgamā”.

“Na katassa ca kattā ca,
metti sandhīyate puna;
Hadayaṃ nānujānāti,
gacchaññeva rathesabha”.

“Katassa ceva kattā ca,
metti sandhīyate puna;
Dhīrānaṃ no ca bālānaṃ,
vasa kuntini māgamā”ti.

Kuntinījātakaṃ tatiyaṃ.