Jātaka

Catukkanipāta

Cūḷa­kuṇāla­vagga

4. Ambajātaka

“Yo nīliyaṃ maṇḍayati,
saṇḍāsena vihaññati;
Tassa sā vasamanvetu,
yā te ambe avāhari”.

“Vīsaṃ vā pañcavīsaṃ vā,
ūnatiṃsaṃ va jātiyā;
Tādisā pati mā laddhā,
yā te ambe avāhari”.

“Dīghaṃ gacchatu addhānaṃ,
ekikā abhisārikā;
Saṅkete pati mā adda,
yā te ambe avāhari”.

“Alaṅkatā suvasanā,
mālinī candanussadā;
Ekikā sayane setu,
yā te ambe avāharī”ti.

Ambajātakaṃ catutthaṃ.