Kathāvatthu

Mahāpaṇṇāsaka

Dvādasamavagga

Jīvitā­vo­ropa­na­kathā

Diṭṭhisampanno puggalo sañcicca pāṇaṃ jīvitā voropeyyāti? Āmantā. Diṭṭhisampanno puggalo sañcicca mātaraṃ jīvitā voropeyya … pe … pitaraṃ jīvitā voropeyya … pe … arahantaṃ jīvitā voropeyya … pe … duṭṭhena cittena tathāgatassa lohitaṃ uppādeyya … pe … saṃghaṃ bhindeyyāti? Na hevaṃ vattabbe … pe ….

Diṭṭhisampanno puggalo sañcicca pāṇaṃ jīvitā voropeyyāti? Āmantā. Diṭṭhisampanno puggalo satthari agāravoti? Na hevaṃ vattabbe … pe … dhamme … pe … saṃghe … pe … sikkhāya agāravoti? Na hevaṃ vattabbe … pe ….

Nanu diṭṭhisampanno puggalo satthari sagāravoti? Āmantā. Hañci diṭṭhisampanno puggalo satthari sagāravo, no ca vata re vattabbe—“diṭṭhisampanno puggalo sañcicca pāṇaṃ jīvitā voropeyyā”ti. Nanu diṭṭhisampanno puggalo dhamme … pe … saṃghe … pe … sikkhāya sagāravoti? Āmantā. Hañci diṭṭhisampanno puggalo sikkhāya sagāravo, no ca vata re vattabbe—“diṭṭhisampanno puggalo sañcicca pāṇaṃ jīvitā voropeyyā”ti.

Diṭṭhisampanno puggalo satthari agāravoti? Āmantā. Diṭṭhisampanno puggalo buddhathūpe ohadeyya omutteyya niṭṭhubheyya buddhathūpe apabyāmato kareyyāti? Na hevaṃ vattabbe … pe ….

Diṭṭhisampanno puggalo sañcicca pāṇaṃ jīvitā voropeyyāti? Āmantā. Nanu vuttaṃ bhagavatā—“ seyyathāpi, bhikkhave, mahāsamuddo ṭhitadhammo velaṃ nātivattati; evameva kho, bhikkhave, yaṃ mayā sāvakānaṃ sikkhāpadaṃ paññattaṃ taṃ mama sāvakā jīvitahetupi nātikkamantī”ti. Attheva suttantoti? Āmantā. Tena hi na vattabbaṃ—“diṭṭhisampanno puggalo sañcicca pāṇaṃ jīvitā voropeyyā”ti.

Jīvitā voropanakathā niṭṭhitā.