Kathāvatthu

Mahāpaṇṇāsaka

Cuddasamavagga

Ariyarūpakathā

Ariyarūpaṃ mahābhūtānaṃ upādāyāti? Āmantā. Ariyarūpaṃ kusalanti? Āmantā. Mahābhūtā kusalāti? Na hevaṃ vattabbe … pe … mahābhūtā abyākatāti? Āmantā. Ariyarūpaṃ abyākatanti? Na hevaṃ vattabbe … pe … ariyarūpaṃ mahābhūtānaṃ upādāyāti? Āmantā. Ariyarūpaṃ anāsavaṃ asaṃyojaniyaṃ aganthaniyaṃ anoghaniyaṃ ayoganiyaṃ anīvaraṇiyaṃ aparāmaṭṭhaṃ anupādāniyaṃ asaṃ­ki­lesi­yanti? Āmantā. Mahābhūtā anāsavā … pe … asaṃkilesiyāti? Na hevaṃ vattabbe … pe … mahābhūtā sāsavā saṃyojaniyā … pe … saṃkilesiyāti? Āmantā. Ariyarūpaṃ sāsavaṃ saṃyojaniyaṃ … pe … saṃkilesiyanti? Na hevaṃ vattabbe … pe ….

Na vattabbaṃ—“ariyarūpaṃ mahābhūtānaṃ upādāyā”ti? Āmantā. Nanu vuttaṃ bhagavatā—“ yaṃ kiñci, bhikkhave, rūpaṃ cattāri mahābhūtāni catunnañca mahābhūtānaṃ upādāyarūpan”ti. Attheva suttantoti? Āmantā. Tena hi ariyarūpaṃ mahābhūtānaṃ upādāyāti.

Ariyarūpakathā niṭṭhitā.