Theravāda Vinaya

Mahāvibhaṅga

Pācittiyakaṇḍa

Saha­dham­mika­vagga

76. Amūla­ka­sikkhā­pada

Tena samayena buddho bhagavā sāvatthiyaṃ viharati jetavane anātha­piṇḍi­kassa ārāme. Tena kho pana samayena chabbaggiyā bhikkhū bhikkhuṃ amūlakena saṃghādisesena anuddhaṃsenti.

Ye te bhikkhū appicchā … pe … te ujjhāyanti khiyyanti vipācenti—“kathañhi nāma chabbaggiyā bhikkhū bhikkhuṃ amūlakena saṃghādisesena anuddhaṃ­ses­santī”ti … pe … “saccaṃ kira tumhe, bhikkhave, bhikkhuṃ amūlakena saṃghādisesena anuddhaṃsethā”ti? “Saccaṃ, bhagavā”ti. Vigarahi buddho bhagavā … pe … kathañhi nāma tumhe, moghapurisā, bhikkhuṃ amūlakena saṃghādisesena anuddhaṃ­ses­sa­tha. Netaṃ, moghapurisā, appasannānaṃ vā pasādāya … pe … evañca pana, bhikkhave, imaṃ sikkhāpadaṃ uddiseyyātha—

“Yo pana bhikkhu bhikkhuṃ amūlakena saṃghādisesena anuddhaṃseyya, pācittiyan”ti. (76:125)

Yo panāti yo yādiso … pe … bhikkhūti … pe … ayaṃ imasmiṃ atthe adhippeto bhikkhūti.

Bhikkhunti aññaṃ bhikkhuṃ.

Amūlakaṃ nāma adiṭṭhaṃ assutaṃ aparisaṅkitaṃ.

Saṃghādisesenāti terasannaṃ aññatarena.

Anuddhaṃseyyāti codeti vā codāpeti vā, āpatti pācittiyassa.

Upasampanne upasam­panna­saññī amūlakena saṃghādisesena anuddhaṃseti, āpatti pācittiyassa. Upasampanne vematiko amūlakena saṃghādisesena anuddhaṃseti, āpatti pācittiyassa. Upasampanne anupa­sam­panna­saññī amūlakena saṃghādisesena anuddhaṃseti, āpatti pācittiyassa.

Ācāravipattiyā vā diṭṭhi­vi­pat­tiyā vā anuddhaṃseti, āpatti dukkaṭassa. Anupasampannaṃ anuddhaṃseti, āpatti dukkaṭassa. Anupasampanne upasam­panna­saññī, āpatti dukkaṭassa. Anupasampanne vematiko, āpatti dukkaṭassa. Anupasampanne anupa­sam­panna­saññī, āpatti dukkaṭassa.

Anāpatti—tathāsaññī codeti, vā codāpeti vā, ummattakassa, ādi­kammi­kas­sāti.

Amūla­ka­sikkhā­padaṃ niṭṭhitaṃ chaṭṭhaṃ.