Saṃyutta Nikāya 1

8. Chetvāvagga

71. Chetvāsutta

Sāvatthi­nidānaṃ. Ekamantaṃ ṭhitā kho sā devatā bhagavantaṃ gāthāya ajjhabhāsi:

“Kiṃsu chetvā sukhaṃ seti,
kiṃsu chetvā na socati;
Kissassu ekadhammassa,
vadhaṃ rocesi gotamā”ti.

“Kodhaṃ chetvā sukhaṃ seti,
kodhaṃ chetvā na socati;
Kodhassa visamūlassa,
madhuraggassa devate;
Vadhaṃ ariyā pasaṃsanti,
tañhi chetvā na socatī”ti.