Saṃyutta Nikāya 10

1. Indakavagga

9. Paṭha­ma­sukkā­sutta

Ekaṃ samayaṃ bhagavā rājagahe viharati veḷuvane kalanda­ka­nivāpe. Tena kho pana samayena sukkā bhikkhunī mahatiyā parisāya parivutā dhammaṃ deseti. Atha kho sukkāya bhikkhuniyā abhippasanno yakkho rājagahe rathikāya rathikaṃ siṅghāṭakena siṅghāṭakaṃ upasaṅkamitvā tāyaṃ velāyaṃ imā gāthāyo abhāsi: 

“Kiṃ me katā rājagahe manussā,
Madhupītāva seyare;
Ye sukkaṃ na payirupāsanti,
Desentiṃ amataṃ padaṃ.

Tañca pana appaṭivānīyaṃ,
Asecana­ka­mo­javaṃ;
Pivanti maññe sappaññā,
Valāhakamiva panthagū”ti.