Saṃyutta Nikāya 2

1. Paṭhamavagga

4. Māgadhasutta

Sāvatthi­nidānaṃ. Ekamantaṃ ṭhito kho māgadho devaputto bhagavantaṃ gāthāya ajjhabhāsi: 

“Kati lokasmiṃ pajjotā,
yehi loko pakāsati;
Bhavantaṃ puṭṭhumāgamma,
kathaṃ jānemu taṃ mayan”ti.

“Cattāro loke pajjotā,
pañcamettha na vijjati;
Divā tapati ādicco,
rattimābhāti candimā.

Atha aggi divārattiṃ,
tattha tattha pakāsati;
Sambuddho tapataṃ seṭṭho,
esā ābhā anuttarā”ti.