Udāna 8.2

Dutiya­nib­bā­na­paṭi­saṃ­yutta­sutta

Evaṃ me sutaṃ—​   ekaṃ samayaṃ bhagavā sāvatthiyaṃ viharati jetavane anātha­piṇḍi­kassa ārāme. Tena kho pana samayena bhagavā bhikkhū nib­bā­na­paṭi­saṃ­yuttāya dhammiyā kathāya sandasseti samādapeti samuttejeti sampahaṃseti. Tedha bhikkhū aṭṭhiṃ katvā manasi katvā sabbaṃ cetaso samannāharitvā ohitasotā dhammaṃ suṇanti.

Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi: 

“Duddasaṃ anataṃ nāma,
na hi saccaṃ sudassanaṃ;
Paṭividdhā taṇhā jānato,
passato natthi kiñcanan”ti.

Dutiyaṃ.