Arthaviniścayasūtram

Outline

Namo Buddhāya!

Evaṁ mayā śrutam:

ekasmin samaye Bhagavān Śrāvastyāṁ viharati sma | Purvārāme Mṛgāra-mātuḥ prāsāde | mahatā bhikṣu-saṅghena sārdham-ardha-trayodaśabhir-bhikṣu-śātaiḥ ||

Tatra ca Bhagavān dhīra-gambhīra-madhurodāra-nirdoṣa-svareṇa | bhikṣun-āmantrayate sma:

“Dharmaṁ vo bhikṣavo deśayiṣyāmi | ādau kalyāṇaṁ madhye kalyāṇaṁ paryavasāne kalyāṇaṁ | svarthaṁ suvyañjanaṁ | kevalaṁ paripurṇaṁ parisuddhaṁ paryavadātaṁ brahmacaryaṁ saṁprakāśayiṣye | yad-uta, Arthaviniścayaṁ nāma Dharmaparyāyam ||

Tac-chṛṇuta sādhu ca suṣṭhu ca manasikuruta, bhāṣiṣye.”

“Sādhu Bhagavann”-iti te bhikṣavo Bhagavataḥ pratyaśrauṣuḥ | Bhagavāṁs-tān-idam-avocat:

“Katamaś-cāsau bhikṣavo ’rthaviniścayo nāma Dharmaparyāyaḥ?

Yad-uta:

  1. Pañca skandhāḥ |
  2. pañcopādāna-skandhāḥ |
  3. aṣṭā-daśa dhātavaḥ |
  4. dvā-daśāyatanāni |
  5. dvā-daśāṅgaḥ pratītya-samutpādaḥ |
  6. catvāry-ārya-satyāni |
  7. dvā-viṁśatir-indriyāṇi |
  8. catvāri dhyānāni |
  9. catasra ārūpya-samāpattayaḥ |
  10. catvāro brahma-vihārāḥ |
  11. catasraḥ pratipadaḥ |
  12. catasraḥ samādhi-bhāvanāḥ |
  13. catvāri smṛty-upasthānāni |
  14. catvāri samyak-prahāṇāni |
  15. catvāra ṛddhi-pādāḥ |
  16. pañcendriyāṇi |
  17. pañca balāni |
  18. sapta bodhyaṅgāni |
  19. āryāṣṭāṅgo mārgaḥ |
  20. ṣoḍaśākārānāpāna-smṛtiḥ |
  21. catvāri srota-āpattyaṅgāni |
  22. daśa Tathāgata-balāni |
  23. catvāri vaiśāradyāni |
  24. catasraḥ pratisaṁvidaḥ |
  25. aṣṭādaśāveṇikā Buddhadharmāḥ |
  26. dvātriṁśan-mahā-puruṣa-lakṣaṇāni |
  27. aśītir-anuvyañjanāni ||

Ayaṁ bhikṣavo ’rthaviniścayasya dharmaparyāyasyoddeśaḥ ||

1. Pañca Skandhāḥ

Tatra bhikṣavaḥ katame pañca skandhāḥ?

Tad-yathā:

  1. Rūpa-skandhaḥ |
  2. vedanā-skandhaḥ |
  3. saṁjñā-skandhaḥ |
  4. saṁskāra-skandhaḥ |
  5. vijñāna-skandhaś-ceti ||

Ime bhikṣavaḥ pañca skandhāḥ ||