Dharmaskandha |

13. jātipratyayā jarāmaraṇaśokaparidevaduḥkhadaurmanasyopāyāsāḥ |

jātipratyayaṃ jarāmaraṇam iti |

jarā katamā | āha | yat teṣāṃ teṣāṃ satvānāṃ tasmiṃ tasmiṃ satvanikāye jātiḥ saṃjātir avakrāntir abhinirvṛttir vistareṇa jīvitendriyasya prādurbhāvaḥ iyam ucyate jātiḥ |

api khalv evam uktaṃ bhagavatā mahānidānaparyāye vyākaraṇe āyuṣmaty ānande |

asti pratyayam ānanda jarāmaraṇaṃ | iti pṛṣṭair astīti syād vacanīyaṃ | vistareṇa yāvaj |

jātiś ced ānanda na syād api nu matsyānāṃ vā matsyatve pakṣināṃ vā pakṣitve vistareṇa yāvad devānāṃ devatve teṣāṃ teṣām ānanda satvānāṃ tasmiṃ tasmin satvanikāye api nu kasya cit kā cij jātiḥ syān | no bhadanta | sarvaśo vā punar ānanda jātyām asatyāṃ api nu jarāmaraṇaṃ prajnāyeta | no bhadanta | tasmāt tarhy ānanda tan nidānaṃ eṣa samudaya eṣa hetur eṣa pratyayo jarāmaraṇasya yad uta jātiḥ | jātipratyayam ānanda jarāmaraṇam iti me yad uktam etat pratyuktaṃ ||

jarā katamā | yat tat khālityaṃ pālityaṃ vistareṇa yāvat saṃskārāṇāṃ purāṇībhāvo jarjarībhāva iyam ucyate jarā |

maraṇaṃ katamad | āha | yat teṣāṃ teṣāṃ satvānāṃ tasmāt tasmāt satvanikāyāc cyutiś cyavanatā bhedo 'ntarhāṇiḥ saṃmoṣaḥ parihāṇiḥ āyuṣo hānir ūṣmaṇo hāniḥ skandhānāṃ nikṣepo jīvitendriyasyoparodho maraṇaṃ kālakriyā idam ucyate maraṇaṃ |

śokaḥ katama | āha | yat tan mātṛmaraṇena pitṛmaraṇena bhrātṛmaraṇena bhaginīmaraṇena jñātikṣayād dhanakṣayād bhogakṣayāt spṛṣṭasya śārīrikābhir vedanābhir duḥkhābis tīvrābhiḥ kharābhiḥ kaṭukābhir amanāpābhiḥ prāṇahāriṇībhir yo dāghaḥ saṃdāghaḥ śokaḥ śocanā śokāyitatvam ayam ucyate śokaḥ |

paridevaḥ katama | āha | tathā dahyate tathā paridahyate | hā aṃba hā tāta hā bhagini hā bhrātaḥ | tad upādāya yad vākyaṃ vacanaṃ vyāhāro bhāṣā gīr niruktir vākpatho vāgghoṣo vācā vākkarma vāgvijñaptir ārttir bhāṣyaṃ vipralāpo lālapyaṃ lālapyanatā paridevaḥ paridevanatā ayam ucyate paridevaḥ |

duḥkhaṃ katamad | āha | paṃcavijñānasaṃprayuktam asātaṃ veditaṃ vedanāgatam idam ucyate duḥkhaṃ |

daurmanasyaṃ katarad | āha | manovijñānaṃsaprayuktaṃ asātaṃ veditaṃ vedanāgatam idam ucyate daurmanasyaṃ |

upāyāsaḥ katama | āha | yaś cetasa āyāsa upāyāsaḥ upāyāsanatā ayam ucyate upāyāsaḥ ||