Dharmaskandha |

15. pañca bhayāni vadyāni vairāṇi |

evaṃ mayā śrutam ekasmin samaye bhagavāṃś chrāvastyāṃ viharati jetavane 'nāthapiṇḍadasyārāme | tatra bhagavān bhikṣūn āmantrayate sma | yasya kasya cid bhikṣavaḥ paṃca bhayāni vadyāni vairāṇi aśāntāni bhavanti sa dṛṣṭa eva dharme vijñānāṃ garhyo bhavati paścāc cānutāpyaḥ kāyasya ca bhedāt paraṃ maraṇād apāyadurgatiṃ vinipātaṃ narakeṣūpapadyate |

katamāni paṃca bhayāni vadyāni vairāṇy aśāntāni bhavanti |

yat prāṇātipātikaḥ prāṇātipātapratyayaṃ vadyaṃ vairaṃ prasavati prāṇātipātād aprativiratasya evam asyedaṃ prathamaṃ bhayaṃ vadyaṃ vairam aśāntaṃ bhavati |

yad adattādāyikaḥ kāmamithyācāriko mṛṣāvādikaḥ

surāmaireyamadyapramādasthāyikaḥ surāmaireyamadyapramādasthānabhayaṃ vadyaṃ vairaṃ prasavati surāmaireyamadyapramādasthānād aprativiratasya evam asyedaṃ paṃcamaṃ bhayaṃ vadyaṃ vairam aśāntaṃ bhavati |

yasya kasya cid imāni paṃca bhayāni vadyāni vairāṇy aśāntāni bhavanti sa dṛṣṭa eva dharme vijñānāṃ garhyo bhavati paścāc cānutāpyaḥ | kāyasya bhedāt paraṃ maraṇād apāyadurgatiṃ vinipātaṃ narakeṣūpapadyate |

yasya tu kasya cit paṃca bhayāni vadyāni vairāṇi śāntāni bhavanti sa dṛṣṭa eva dharme vijñānāṃ praśasyo bhavati paścāc ca nānutāpyaḥ kāyasya ca bhedāt sugatau svargaloke deveṣūpapadyate |

katamāni paṃca bhayāni vadyāni vairāṇi śāntāni bhavanti |

yat* prāṇātipātikaḥ prāṇātipātapratyayaṃ bhayaṃ vadyaṃ vairaṃ prasavati prāṇātipātāt prativiratasya evam asyedaṃ prathamaṃ vadyaṃ vairaṃ śāntaṃ bhavati |

yad adattādāyikaḥ kāmamithyācāriko mṛṣāvādikaḥ

surāmaireyamadyapramādasthāyikaḥ surāmaireyamadyapramādasthānapratya­yaṃ bhayaṃ vadyaṃ vairaṃ prasavati surāmaireyamadyapramādasthānāt prativiratasya evam asyedaṃ paṃcamaṃ bhayaṃ vadyaṃ vairaṃ śāntaṃ bhavati |

yasya kasya cid imāni paṃca bhayāni vadyāni vairāṇi śāntāni bhavanti sa dṛṣṭa eva dharme vijñānāṃ praśasyo bhavati paścāc ca nānutāpyaḥ kāyasya ca bhedāt sugatau svargaloke deveṣūpapadyate | idam avocad bhagavān | idam uktvā sugato hy athāparam etad uvāca śāstā ||

yaḥ prāṇam atipātayati mṛṣāvādaṃ ca bhāṣate |
loke adattam ādatte paradāraṃ ca gacchati |
surāmaireyapānaṃ ca yo naro hy adhigṛdhyati |
saktaḥ paṃcasu dharmeṣu duḥśīla iti kathyate |
kāyasya bhedād duṣprajño narakeṣūpapadyate ||
yas tu prāṇaṃ nātipātayati mṛṣāvādaṃ na bhāṣate |
loke adattaṃ nādatte paradāraṃ na gacchati |
surāmaireyapānaṃ ca yo naro nādhigṛdhyati |
muktaḥ paṃcasu dharmeṣu śīlavān iti kathyate |
kāyasya bhedāt sugato svargaloke deveṣūpapadyate |

<|blockquote>

idam avocat* ||