Divyāvadānam

7. nagarāvalambikāvadānam

atha bhagavān kośaleṣu janapadeṣu cārikāṃ carañ śrāvastīmanuprāptaḥ |
śrāvastyāṃ viharati jetavane anāthapiṇḍadasyārāme |
aśrauṣīdanāthapiṇḍado gṛhapatih—bhagavān kośaleṣu janapadeṣu cārikāṃ carañ śrāvastīmanuprāptaḥ |
śrāvastyāṃ viharati jetavane anāthapiṇḍadasyārām iti |
śrutvā ca punaryena bhagavāṃstenopasaṃkrāntaḥ |
upasaṃkramya bhagavataḥ pādau śirasā vanditvā ekānte niṣaṇṇaḥ |
ekānta­niṣaṇṇa­manā­thapiṇḍadaṃ gṛhapatiṃ bhagavān dharmyayā kathayā saṃdarśayati samādāpayati samuttejayati saṃpraharṣayati |
anekaparyāyeṇa dharmyayā kathayā saṃdarśya samādāpya samuttejya saṃpraharṣya tūṣṇīm |
anāthapiṇḍado gṛhapatih utthāyāsanādekāṃ­sa­mutta­rā­saṃ­gaṃ kṛtvā yena bhagavāṃstenāñjaliṃ praṇamya bhagavantamidamavocat—adhivāsayatu me bhagavāñ śvo ’ntargṛhe bhuktena sārdhaṃ bhikṣusaṃghena iti |
adhivāsayati bhagavānanāthapiṇḍadasya gṛhapatestūṣṇībhāvena |
anāthapiṇḍado gṛhapatirbhagavatastūṣṇī­bhāvenā­dhivāsanāṃ viditvā bhagavato bhāṣitamabhinandyānumodya bhagavataḥ pādau śirasā vanditvā bhagavato ’ntikāt prakrānto yena svaniveśanaṃ tenopasaṃkrāntaḥ |
upasaṃkramya dauvārikaṃ puruṣamāmantrayate—na tāvadbhoḥ puruṣa tīrthyānāṃ praveśo dātavyo yāvad buddhapramukhena bhikṣusaṃghena bhuktaṃ bhavati |
tataḥ paścādahaṃ tīrthyānāṃ dāsyāmīti |
evamāryeti dauvārikaḥ puruṣo ’nāthapiṇḍadasya gṛhapateḥ pratyaśrauṣīt |
anāthapiṇḍado gṛhapatistāmeva rātriṃ śuci praṇītaṃ khādanīyabhojanīyaṃ samudānīyaṃ kālyamevotthāya āsanāni prajñapya udakamaṇīn pratiṣṭhāpya bhagavato dūtena kālamārocayati—samayo bhadanta, sajjaṃ bhaktam yasyedānīṃ bhagavān kālaṃ manyata iti |
atha bhagavān pūrvāhṇe nivāsya pātracīvaramādāya bhikṣugaṇaparivṛto bhikṣusaṃghapuraskṛto yena anāthapiṇḍadasya gṛhapaterbhaktābhisārastenopa­saṃk­rāntaḥ |
upasaṃkramya purastādbhikṣusaṃghasya prajñapta evāsane niṣaṇṇaḥ |
atha anāthapiṇḍado gṛhapatiḥ sukhopaniṣaṇṇaṃ buddhapramukhaṃ bhikṣusaṃghaṃ viditvā śucinā praṇītena khādanīyabhojanīyena svahastaṃ saṃtarpayati saṃpravārayati |
anekaparyāyeṇa śucinā praṇītena khādanīyabhojanīyena svahastaṃ saṃtarpya saṃpravārya bhagavantaṃ bhuktavantaṃ viditvā dhautahastamapanītapātraṃ nīcataramāsanaṃ gṛhītvā bhagavataḥ purastānniṣaṇṇo dharmaśravaṇāya |
|
athāyuṣmān mahākāśyapo ’n­yata­masmādāraṇyakācchayanāsanāt dīrghakeśaśmaśrurlūhacīvaro jetavanaṃ gataḥ |
sa paśyati jetavanaṃ śūnyam |
tenopadhivārikaḥ pṛṣṭah—kutra buddhapramukho bhikṣusaṃgha iti |
tena samākhyātam—anāthapiṇḍadena gṛhāpatinopanimantrita iti |
sa saṃlakṣayati—gacchāmi, tatraiva piṇḍapātaṃ paribhokṣyāmi, buddhapramukhaṃ ca bhikṣusaṃghaṃ paryupāsiṣyāmīti |
so ’nāthapiṇḍadasya gṛhapater niveśanaṃ gataḥ |
ato dauvārikena uktah—ārya tiṣṭha, mā pravekṣyasi |
kasyārthāya? anāthapiṇḍadena gṛhapatinā ājñā dattā—mā tāvat tīrthyānāṃ praveśaṃ dāsyasi, yāvadbuddhapramukhena bhikṣusaṃghena bhuktam |
tataḥ paścāt tīrthyānāṃ dāsyāmi iti |
athāyuṣmān mahākāśyapaḥ saṃlakṣayati—tasya me lābhāḥ sulabdhāḥ, yanmāṃ śrāddhā brāhmaṇagṛhapatayaḥ śramaṇaśākyaputrīya iti na jānante |
gacchāmi, kṛpaṇajanasyānugrahaṃ karomīti viditvā udyānaṃ gataḥ |
sa saṃlakṣayati—adya mayā kasyānugrahaḥ kartavya iti |
yāvadanyatamā nagarāvalambikā kuṣṭhābhidrutā sarujārtā pakvagātrā bhikṣāmaṭati |
sa tasyāḥ sakāśamupasaṃkrāntaḥ |
tasyāśca bhikṣāyāmāyāsaḥ saṃpannaḥ |
tayā āyuṣmān mahākāśyapo dṛṣṭaḥ kāyaprāsādikaś­cittaprāsādikaḥ śāntena īryāpathena |
sā saṃlakṣayati—nūnaṃ mayā evaṃvidhe dakṣiṇīye kārā kṛtā, yena me iyamevamrūpā samavasthā |
yadi āryo mahākāśyapo mamāntikādanukampāmu­pādāya ācāmaṃ pratigṛhṇīyāt, ahamasmai dadyāmiti |
tata āyuṣmatā mahākāśyapena tasyāścetasā cittamājñāya pātramupanāmitam—yadi te bhagini parityaktam, dīyatāmasmin pātra iti |
tatastayā cittamabhiprasādya tasmin pātre dattam |
makṣikā ca patitā |
sā tāmapanetumārabdhā |
tasyāstasminnācāme ’ṅguliḥ patitā |
saṃlakṣayati—kiṃ cāpyāryeṇa mama cittānurakṣayā na cchoritaḥ, api tu na paribhokṣyatīti |
athāyuṣmatā mahākāśyapena tasyāścetasā cittamājñāya tasyā eva pratyakṣamanyatamaṃ kuḍyamūlaṃ niśritya paribhuktam |
sa saṃlakṣayati—kiṃ cāpi āryeṇa mama cittānurakṣayā paribhuktam, nānenāhāreṇāhārakṛtyaṃ kariṣyati iti |
athāyuṣmān mahā­kāśyapastasyāś­citta­mājñāya tāṃ nagarāvalambikāmidamavocat—bhagini prāmodyamutpādayasi, ahaṃ tvadīyenāhāreṇa rātriṃ­divasamatināmayiṣyāmi iti |
tasyā atīva audbilyamutpannam—mamāryeṇa mahākāśyapena piṇḍapātaḥ pratigṛhīta iti |
tata āyuṣmatī mahākāśyape cittamabhiprasādya kālaṃ gatā tuṣite devanikāye upapannā |
sā śakreṇa devendreṇa dṛṣṭā ācāmaṃ pratipādayantī cittamabhiprasādayantī kālaṃ ca kurvāṇā |
no tu dṛṣṭā kutropapannā iti |
sa narakān vyavalokayitumārabdho na paśyati, tiryak ca pretaṃ ca manuṣyāṃścāturmahārājikān devāṃstrāyastriṃśān yāvanna paśyati |
tathā hyadhastāddevānāṃ jñānadarśanaṃ pravartate no tūpariṣṭāt |
atha śakro devānāmindro yena bhagavāṃstenopasaṃkrāntaḥ |
upasaṃkramya gāthābhigītena praśnaṃ papraccha— carataḥ piṇḍapātaṃ hi kāśyapasya mahātmanaḥ |
kutrāsau modaye nārī kāśyapācāmadāyikā (1)|
bhagavānāha— tuṣitā nāma te devāḥ sarvakāmasamṛddhayaḥ |
yatrāsau modate nārī kāśyapācāmadāyikā (2)|
iti |
|
atha śakrasya devānāmindrasyaitadabhavat—ime ca tāvanmanuṣyāḥ puṇyāpuṇyānāmapratyakṣadarśino dānāni dadati, puṇyāni kurvanti |
ahaṃ pratyakṣadarśanena puṇyānāṃ svapuṇyaphale vyavasthitaḥ kasmāt dānāni na dadāmi, puṇyāni vā na karomi? ayamāryo mahākāśyapo dīnānā­thakṛpaṇavanīpakānukampī |
yannvahamenaṃ piṇḍakena pratipādayeyam |
iti viditvā kṛpaṇavīthyāṃ gṛhaṃ nirmitavān |
avacīravicīrakaṃ kākābhilīnakaṃ nātiparamarūpaṃ kuvindaṃ cātmānamabhinimārya udūḍhaśiraskaḥ saṇaśāṭikānivāsitaḥ sphaṭitapāṇipādo vastraṃ vāyitumārabdhah |
śacī api devakanyā kuvindanaryā veśadhāriṇī tasarikāṃ kartumārabdhā |
pārśve cāsyā divyā sudhā sajjīkṛtā tiṣṭhati |
athāyuṣmān mahākāśyapaḥ kṛpaṇānāthavanīpakajanānukampako ’nupūrveṇa tadgṛhamanuprāptaḥ |
duḥkhitako ’yamiti kṛtvā dvāre sthitena pātraṃ prasāditam |
śakreṇa devānāmindreṇa divyayā sudhayā pūritam |
athāyuṣmato mahā­kāśyapasyaitadabhavat— divyaṃ cāsya sudhābhaktamayaṃ ca gṛhavistaraḥ |
suviruddhamiti kṛtvā jāto me hṛdi saṃśayaḥ (3)|
iti |
|
dharmatā hyeṣā—asamanvāhṛtya arhatāṃ jñānadarśanaṃ na pravartate |
sa samanvāhartuṃ pravṛttaḥ |
yāvat paśyati śakraṃ devendram |
sa kathayati—kauśika, kiṃ duḥkhitajanasyāntarāyaṃ karoṣi, yasya te bhagavatā dīrgharātrānugato vicikitsākathaṃ­kathāśalyaḥ samūla ārūḍho yathāpi tattathāgatenārhatā samyaksambuddhena |
ārya mahākāśyapa kiṃ duḥkhitajanasyāntarāyaṃ karomi? ime tāvat manuṣyāḥ puṇyānāmapratyakṣadarśino dānāni dadati puṇyāni kurvanti |
ahaṃ pratyakṣadarśī eva puṇyānāṃ kathaṃ dānāni na dadāmi? nanu coktaṃ bhagavatā— karaṇīyāni puṇyāni duḥkhā hyakṛtapuṇyatā |
kṛtapuṇyāni modante asmimlloke paratra ca (4)|
tataḥ prabhṛti āyuṣmān mahākāśyapaḥ samanvāhṛtya kulāni piṇḍapātaṃ praveṣṭumārabdhaḥ |
atha śakro devendra ākāśasthaścāyuṣmato mahākāśyapasya piṇḍapātaṃ carato divyayā sudhayā pātraṃ pūrayati |
āyuṣmānapi mahākāśyapaḥ pātramadhomukhaṃ karoti |
annapānaṃ choryate |
etat prakaraṇaṃ bhikṣavo bhagavata ārocayanti |
bhagavānāha—tasmādanujānāmi piṇḍopadhānaṃ dhārayitavyamiti |
|
sāmantakena śabdo visṛtah—amukayā nagarāvalambikayā āryo mahākāśyapa ācāmena pratipāditaḥ, sā ca tuṣite devanikāye upapannā iti |
rājñā prasenajitā kauśalena śrutam—amukayā nagarāvalambikayā āryo mahākāśyapa ācāmena pratipāditaḥ |
sā tuṣite deve upapannā iti |
śrutvā ca punaryena bhagavāṃstenopasaṃkrāntaḥ |
upasaṃkramya bhagavataḥ pādau śirasā vanditvā ekānte niṣaṇṇaḥ |
ekāntaniṣaṇṇaṃ rājānaṃ prasenajitaṃ kauśalaṃ bhagavān dharmyayā kathayā saṃdarśayati samādāpayati samuttejayati saṃpraharṣayati, anekaparyāyeṇa dharmyayā kathayā saṃdarśya samādāpya samuttejya saṃpraharṣya tūṣṇīm |
atha rājā prasenajit kauśala utthāyāsanādekāṃ­sa­mutta­rāsaṅgaṃ kṛtvā yena bhagavāṃstenāñjaliṃ praṇamya bhagavantamidamavocat—adhivāsayatu me bhagavānārya­mahā­kāśyapamuddiśya bhaktaṃ saptāhena iti |
adhivāsayati bhagavān rājñaḥ prasenajitas tūṣṇībhāvena |
atha rājā prasenajit kauśalo bhagavatastūṣṇī­bhāvenā­dhivāsanāṃ viditvā bhagavato ’ntikāt prakrāntaḥ |
atha rājā prasenajit kauśalastāmeva rātriṃ praṇītaṃ khādanīyaṃ bhojanīyaṃ samudānīyaṃ kālyamevotthāya āsanāni prajñāpya udakamaṇīn pratiṣṭhāpya bhagavato dūtena kālamārocayati—samayo bhadanta, sajjaṃ bhaktam yasyedānīṃ bhagavān kālaṃ manyata iti |
atha bhagavān pūrvāhṇe nivāsya pātracīvaramādāya bhikṣugaṇaparivṛto bhikṣusaṃghapuraskṛto yena rājñaḥ prasenajitaḥ kauśalasya bhaktābhisārastenopa­saṃk­rāntaḥ |
upasaṃkramya purastādbhikṣusaṃghasya prajñapta evāsane niṣaṇṇaḥ |
atha rājā prasenajit kauśalaḥ sukhopaniṣaṇṇaṃ buddhapramukhaṃ bhikṣusaṃghaṃ viditvā śucinā praṇītena khādanīyabhojanīyena svahastaṃ saṃtarpayati saṃpravārayati |
anyatamaśca kroḍamallako vṛddhānte citta­mabhiprasā­da­yaṃs­tiṣṭhati—ayaṃ rājā pratyakṣadarśīm eva puṇyānāṃ sve puṇyaphale pratiṣṭhāpito ’tṛpta eva puṇyairdānāni dadāti, puṇyāni karoti |
atha rājā prasenajit kauśalo ’nekaparyāyeṇa buddhapramukhaṃ bhikṣusaṃghaṃ śucinā praṇītena khādanīyena bhojanīyena svahastaṃ saṃtarpya saṃpravārya bhagavantaṃ bhuktavantaṃ viditvā dhautahastamapanītapātraṃ nīcataramāsanaṃ gṛhītvā bhagavataḥ purastāt niṣaṇṇo dharmaśravaṇāya |
tato bhagavatā abhihitah—mahārāja, kasya nāṃnā dakṣiṇāmādiśāmi? kiṃ tava, āhosvidyena tavāntikāt prabhūtataraṃ puṇyaṃ prasūtamiti? rājā saṃlakṣayati—māṃ bhagavān piṇḍapātaṃ paribhuṅkte |
ko ’nyo mamāntikāt prabhūtataraṃ puṇyaṃ prasaviṣyatīti viditvā kathayati—bhagavan yena mamāntikāt prabhūtataraṃ puṇyaṃ prasūtaṃ tasya bhagavān nāṃnā dakṣiṇāmādiśatu iti |
tato bhagavatā kroḍamallakasya nāṃnā dakṣiṇā ādiṣṭā |
evam yāvat ṣaḍdivasān |
tato ’nyadivase rājā kare kapolaṃ dattvā cintāparo vyavasthitah—mama bhagavān piṇḍapātaṃ paribhuṅkte, kroḍamallakasya nāṃnā dakṣiṇāmādiśati iti |
so ’mātyairdṛṣṭaḥ |
te kathayanti—kimarthaṃ kare kapolaṃ dattvā cintāparo vyavasthita iti? rājā kathayati—bhavantaḥ, kathaṃ na cintāparastiṣṭhāmi, yatredānīṃ sa bhagavān mama piṇḍapātaṃ paribhuṅkte, kroḍamallakasya nāṃnā dakṣiṇāmāmādiśatīti? tatraiko vṛddho ’mātyaḥ kathayati—alpotsuko bhavatu |
vayaṃ tathā kariṣyāmo yathā śvo bhagavān devasyaiva nāṃnā dakṣiṇāmādiśatīti |
taiḥ pauruṣeyāṇāmājñā dattā yataḥ śvo bhavadbhiḥ praṇīta āhāraḥ sajjīkartavyaḥ prabhūtaścaiva samudānayitavyo yathopārdhaṃ bhikṣūṇāṃ pātre patati upārdhaṃ bhūmau iti |
amātyairaparasmin divase prabhūta āhāraḥ sajjīkṛtaḥ praṇītaśca |
tataḥ sukhopaniṣaṇṇaṃ buddhapramukhaṃ bhikṣusaṃghaṃ pariveṣitumārabdhaḥ |
upārdhaṃ bhikṣūṇāṃ pātre patati, upārdhaṃ bhūmau |
tataḥ kroḍamallakāḥ pradhāvitāh—bhūmau nipatitaṃ gṛhṇīma iti |
te pariveṣakair nivāritāḥ |
tataḥ kroḍamallakaḥ kathayati—yadyasya rājñaḥ prabhūtamannam, svāpateyamasti, santyanye ’pi asmadvidhā duḥkhitakā ākāṅkṣante |
kimarthaṃ na dīyate? kimanenāparibhogaṃ choritena iti |
tasya kroḍamallakasya cittavikṣepo jātah—na śakyaṃ tena tathā cittaṃ prasādayitum yathā pūrvam |
tato rājā buddhapramukhaṃ bhikṣuasaṃghaṃ bhojayitvā na mama nāṃnā dakṣiṇāmādiśatīti viditvā dakṣiṇāmaśrutvaiva praviṣṭaḥ |
tato bhagavatā rājñaḥ prasenajitaḥ kauśalasya nāṃnā dakṣiṇā ādiṣṭā— hastyaśvarathapattiyāyino bhuñjānasya puraṃ sanairgamam |
paśyasi(?) phalaṃ hi rūṣkikāyā alavaṇikāyāḥ kulmāṣapiṇḍikāyāḥ (5)|
athāyuṣmānānando bhagavantamidamavocat—bahuśo bahuśo bhadanta bhagavatā rājñaḥ prasenajitaḥ kauśalasya niveśane bhuktvā nāṃnā dakṣiṇāmādiṣṭā |
nābhijānāmi kadācidevamrūpāṃ dakṣiṇāmādiṣṭapūrvām |
bhagavānāha—icchasi tvamānanda rājñaḥ prasenajitaḥ kauśalasyālavaṇikāṃ kulmāṣapiṇḍakāmārabhya karmaplotiṃ śrotum? etasya bhagavan kālaḥ, etasya sugata samayaḥ |
ayaṃ bhagavān rājñaḥ prasenajitaḥ kauśalasyālavaṇikāṃ kulmāṣapiṇḍakāmārabhya karmaplotiṃ varṇayet, bhagavataḥ śrutvā bhikṣavo dhārayiṣyanti iti |
tatra bhagavān bhikṣūnāmantrayate sma— bhūtapūrvaṃ bhikṣavo ’nyatamasmin karpaṭake gṛhapatiḥ prativasati |
tena sadṛśāt kulāt kalatramānītam |
sa tayā sārdhaṃ krīḍati ramate paricārayati |
tasya krīḍato ramamāṇasya paricārayataḥ putro jātaḥ |
sa unnīto vardhitaḥ paṭuḥ saṃvṛttaḥ |
yāvadasau gṛhapatiḥ patnīmāmantrayate—bhadra, jāto ’smākamṛṇahārako dhanahārakaśca |
gacchāmi paṇyamādāya deśāntaramiti |
sā kathayati—āryaputra, etat kuruṣva iti |
sa paṇyamādāya deśāntaraṃ gataḥ |
tatraivānayena vyasanamāpannaḥ |
alpaparicchado ’sau gṛhapatiḥ |
tasya gṛhapaterdhanajātaṃ parikṣīṇam |
so ’sya putro duḥkhito jātaḥ |
tasya gṛhapatervayasyakaḥ |
tena tasya dārakasya mātā abhihitā—ayaṃ tava putraḥ kṣetraṃ rakṣatu, ahamasya sukhaṃ bhuktena yogodvahanaṃ kariṣyāmi |
evaṃ bhavatu |
sa tasya kṣetraṃ rakṣitumārabdhaḥ |
sa tasya sukhaṃ bhaktakena yogodvahanaṃ kartumārabdhaḥ |
yāvadapareṇa samayena parvaṇī pratyupasthitā |
tasya dārakasya mātā saṃlakṣayati—adya gṛhapatipatnī suhṛtsambandhibāndhavāḥ saha śramaṇabrāhmaṇabhojanena vyagrā bhaviṣyati |
gacchāmi sānukālaṃ tasya dārakasya bhaktaṃ nayāmi iti |
sā sānukālaṃ gatvā gṛhapatipatnyā etamarthaṃ niveśayati |
sā ruṣitā kathayati—na tāvacchramaṇabrāhmaṇebhyo dadāmi jñātīnāṃ vā, tāvat preṣyamanuṣyāya dadāmi? adya tāvat tiṣṭhatu, śvo dviguṇaṃ dāsyāmīti |
tatastasya dārakasya mātā saṃlakṣayati—mā me putro bubhukṣitakaḥ sthāsyatīti |
tayā ātmano ’rthe ’lavaṇikā kulmāṣapiṇḍakā saṃpāditā |
sā tāmādāya gatā |
tena dārakeṇa dūrata eva dṛṣṭā |
sa kathayati—amba, asti kiṃcinmṛṣṭaṃ mṛṣṭam? sā kathayati—putra, yadeva prātidaivasikaṃ tadapyadya nāsti |
mayā ātmano ’rthe ’lavaṇikā kulmāṣapiṇḍikā sādhitā |
tāmahaṃ gṛhītvā āgatā |
etāṃ paribhuṅkṣveti |
sa kathayati—sthāpayitvā gacchasveti |
sā sthāpayitvā prakrāntā |
|
asati buddhānāmutpāde pratyekabuddhā loke utpadyante hīnadīnānukampakāḥ prantaśayanāsanabhaktā ekadakṣiṇīyā lokasya |
yāvadanyatamaḥ praty­eka­buddhas­tatpradeśamanuprāptaḥ |
sa tena dṛṣṭaḥ kāyaprāsādikaścitraprāsādikaśca śānteryāpathavartī |
sa saṃlakṣayati—nūnaṃ mayā evaṃvidhe sadbhūte dakṣiṇīye kārā na kṛtā, yena me īdṛśī samavasthā |
yadyayaṃ mamāntikādalavaṇikāṃ kulmāṣapiṇḍikāṃ pratigṛhṇīyāt, ahamasmai dadyāmiti |
tato ’sau pratyekabuddhastasya daridrapuruṣasya cetasā cittamājñāya pātraṃ prasāritavān—bhadramukha, sacette parityaktam, dīyatāmasmin pātra iti |
tatastena tīvreṇa prasādena sā alavaṇikā kulmāṣapiṇḍakā tasmai pratyekabuddhāya pratipāditā |
|
kiṃ manyadhve bhikṣavo yo ’sau daridrapuruṣaḥ, eṣa evāsau rājā prasenajit kauśalastena kālena tena samayena |
yadanena pratyekabuddhāyālavaṇikā kulmāṣapiṇḍakā pratipāditā, tena karmaṇā ṣaṭkṛtvo deveṣu trāyastriṃśeṣu rājyaiśvaryādhipatyaṃ kāritavān, ṣaṭkṛtvo ’syāmeva śrāvastyāṃ rājā kṣatriyo mūrdhnābhiṣiktaḥ, tenaiva ca karmaṇā avaśeṣeṇa etarhi rājā kṣatriyo mūrdhnābhiṣiktaḥ saṃvṛttaḥ |
so ’sya tamahaṃ saṃdhāya kathayāmi— hastyaśvarathapattiyāyino bhuñjānasya puraṃ sanairgamanam |
paśyasi phalaṃ hi rūkṣikāyā alavaṇikāyā kulmāṣapiṇḍakāyāḥ |
|
iti |
sāmantakena śabdo visṛtah—bhagavatā rājñaḥ prasenajito ’lavaṇikāṃ kulmāṣapiṇḍakāmārabhya karmaplotirvyākṛtā iti |
rājñāpi prasenajitā śrutam |
sa yena bhagavāṃ­setenopa­saṃk­rāntaḥ |
upasaṃkramya bhagavataḥ pādau śirasā vanditvā ekānte niṣaṇṇaḥ |
ekāntaniṣaṇṇaṃ rājānaṃ prasenajitaṃ kauśalaṃ bhagavān dharmyayā kathayā saṃdaraśyati samādāpayati samuttejayati saṃpraharṣayati |
anekaparyāyeṇa dharmyayā kathayā saṃdarśya samādāpya samuttejya saṃpraharṣya tūṣṇīm |
atha rājā prasenajit kauśala utthāyāsanādekāṃ­samutterāsaṅgaṃ kṛtvā bhagavantamidamavocat—adhivāsayatu me bhagavāṃs traimāsīṃ cīvarapiṇḍapātaśayanāsanaglānapratyayabhaiṣajya­pari­ṣkāraiḥ sārdhaṃ saṃgheneti |
adhivāsayati bhagavān rājñaḥ prasenajitaḥ kauśalasya tūṣṇībhāvena |
tato rājñā prasenajitā kauśalena buddhamukhāya bhikṣusaṃghāya traimāsyaṃ śatarasaṃ bhojanaṃ dattam |
ekaikaśca bhikṣuḥ śatasahasreṇa vastreṇācchāditaḥ |
tailasya ca kumbhakoṭiṃ samudānīya dīpamālā abhyudyato dātum |
tatra bhakte pūjāyāṃ ca mahān kolāhalo jātaḥ |
yāvadanyatamā nagarāvalambikā atīva duḥkhitā |
tayā kroḍamallakena bhikṣāmaṭantyā uccaśabdhaḥ śrutaḥ |
śrutvā ca punaḥ pṛcchati—bhavantaḥ, kimeṣa uccaśabdo mahāśabda iti |
aparaiḥ samākhyātam—rājñā prasenajitā kauśalena buddhapramukho bhikṣuasṃghastraimāsyaṃ bhojitaḥ, ekaikaśca bhikṣuḥ śatasahasreṇa vastreṇa ācchāditaḥ, tailasya kumbhakoṭiṃ ca samudānīya dīpamālā abhyudyato dātumiti |
tatastasyā nagarāvalambikāyā etadabhavat—ayaṃ tāvadrājā prasenajit kauśalaḥ puṇyairatṛpto ’dyāpi dānāni dadāti, puṇyāni karoti |
yannvahamapi kutaścit samudānīya bhagavataḥ pradīpaṃ dadyāmiti |
tayā khaṇḍamallake tailasya stokam yācayitvā pradīpaṃ prajvālya bhagavataścaṅkrame dattaḥ |
pādayor nipatya praṇidhānaṃ kṛtam—anenāhaṃ kuśalamūlena yathāyaṃ bhagavāñ śākyamunirvarṣaśatāyuṣi prajāyāṃ śākyamunir nāma śāstā loka utpannaḥ, evamahamapi varṣaśatāyuṣi prajāyāṃ śākyamunireva śāstā bhaveyam |
yathā cāsya dāriput­rama­udgalyāyanāgrayugaṃ bhadrayugamānando bhikṣurupasthāyakaḥ, śuddhodanaḥ pitā, mātā mahāmāyā, rāhulabhadraḥ kumāraḥ putraḥ |
yathāyaṃ bhagavān dhātuvibhāgaṃ kṛtvā parinirvāsyati, evamahamapi dhātuvibhāgaṃ kṛtvā parinirvāpayeyamiti |
yāvat sarve te dīpā nairvāṇāḥ |
sa tayā prajvalitaḥ pradīpaḥ prajvalatyeva |
dharmatā khalu buddhānāṃ bhagavatām—na tāvadupasthāyakāḥ pratisamlīyante na yāvadbuddhā bhagavantaḥ pratisamlīnā iti |
athāyuṣmānānandaḥ saṃ­lakṣayati—asthānamanavakāśo yadbuddhā bhagavanta āloke śayyāṃ kalpayanti |
yannvahaṃ dīpam nirvāpayeyamiti |
sa hastena nirvāpayitumārabdho na śaknoti |
tataścīvarakarṇikena, tato vyajanena, tathāpi na śaknoti nirvāpayitum |
tatra bhagavānāyuṣmanta­māna­ndamā­mantra­yate—kimetadānandeti |
sa kathayati—bhagavan, mama buddhirutpanā—asthānamanavakāśo yadbuddhā bhagavanta āloke śayyāṃ kalpayanti |
yannvahaṃ dīpaṃ nirvāpayeyamiti |
so ’haṃ hastena nirvāpayitumārabdho na śaknomi, tataścīvarakarṇikena, tato vyajanena, tathāpi na śaknomīti |
bhagavānāha—khedamānanda āpatsyase |
yadi vairambhakā api vāyavo vāyeyuḥ, te ’pi na śaknuyur nirvāpayituṃ prāgeva hastagataścīvarakarṇiko vyajanaṃ vā |
tathā hi—ayaṃ pradīpastayā dārikayā mahatā cittābhisaṃskāreṇa prajvalitaḥ |
api tu ānanda bhaviṣyatyasau dārikā varṣaśatāyuṣi prajāyāṃ śākyamunir nāma tathāgato ’rhan samyaksambuddhaḥ |
śāriputramaudgalyāyanau tasyāgrayugaṃ bhadrayugam, ānando bhikṣurupāsakaḥ, śuddhodanaḥ pitā, mahāmāyā mātā, kapilavastu nagaram, rāhulabhadraḥ kumāraḥ putraḥ |
sāpi dhātuvibhāgaṃ kṛtvā parinirvāsyatīti |
|
idamavocadbhagavān |
āttamanasaste ca bhikṣavo bhagavato bhāṣitamabhyanandan |
|
iti śrīdivyāvadāne nagarāvalambikāvadānaṃ saptamam |
|