Dhvajāgrasūtra

evaṃ mayā śrutam | ekasmiṃ samaye bhagavāṃ śrāvastyāṃ viharati sma jetavane anāthapiṇḍadasyārāme |

tatra bhagavāṃ bhikṣūn āmantrayate sma |

sati vo bhikṣava araṇyagatānāṃ vā vṛkṣamūlagatānāṃ vā śunyāgāragatānāṃ vā utpadyeta bhayaṃ vā chambitatvaṃ vā romaharṣo vā |

māṃ yūyaṃ tasmiṃ samaye ākārataḥ samanusmarata |

iti hi sa bhagavāṃ tathāgato ’rhāṃ samyaksaṃbuddho vidyācaraṇasampanna sugato lokavid anuttaraḥ puruṣadamyasārathi śāstā devamanuṣyāṇāṃ buddho bhagavāṃ |

māṃ vas tasmiṃ samaye ākārataḥ samanusmaratām | yad utpatsyate bhayaṃ vā chambitatvaṃ vā romaharṣo vā tat prahāsyate |

bhūtapūrvaṃ bhikṣava śakro devendro devāsurasaṃgrāme pratyupasthite devāms trāyastriṃśān āmantrayati |

sati vo māriṣā devāsurasaṃgrāme samabhirūḍhāṇāṃ utpadyeta bhayaṃ vā chambitatvaṃ vā romaharṣo vā |

mama vas tasmiṃ samaye vaijayanto dhvajāgraḥ samanusmartavyaḥ | mama vas tasmiṃ samaye vaijayantaṃ dhvajāgraṃ samanusmaratāṃ | yad utpatsyate bhayaṃ vā chambitatvaṃ vā romaharṣo vā tat prahāsyate |

evam eva sati vo bhikṣava araṇyagatānāṃ vā vṛkṣamūlagatānāṃ vā śunyāgāragatānāṃ vā utpadyeta bhayaṃ vā chambitatvaṃ vā romaharṣo vā |

māṃ yūyaṃ tasmiṃ samaye ākārataḥ samanusmarata | iti hi sa bhagavāṃ yāvad buddho bhagavāṃ |

māṃ vas tasmiṃ samaye ākārataḥ samanusmaratāṃ yad utpatsyate bhayaṃ vā chambitatvaṃ vā romaharṣo vā tat prahāsyate |

tat kasmād dheto | sa hi śakro devendraḥ sarāgaḥ sadveṣaḥ samoha aparimukto jāti­jarāv­yādhi­maraṇa­śoka­pari­deva­duḥkha­daurmanasyopāyāsebhyaḥ aparimukto duḥkhād iti vadāmi |

bhīru chambī utrāsī palāyī sa ekatā bibhety api utrāsity api palāyaty api |

ahaṃ khalu tathāgato loke utpanna arhāṃ samyaksaṃbuddho vidyācaraṇasaṃpannaḥ sugato lokavid anuttaraḥ puruṣadamyasārathi śāstā devamanuṣyāṇāṃ buddho bhagavāṃ |

vigatarāgo vigatadveṣo vigatamohaḥ parimukto jāti­jarāv­yādhi­maraṇa­śoka­pari­deva­duḥkha­daurmanasyopāyāsebhya parimukto duḥkhād iti vadāmi |

abhīrur acchaṃbī anutrāsī apalāyī |

tasya mama bhikṣava abhīruṇa acchaṃbina anutrāsina apalāyinaḥ śrotavyaṃ vacanaṃ kartavyaṃ anuśāsanaṃ karaṇīyam idaṃ sthānam iti |

idam avocad bhagavāṃ āpatamanasas te bhikṣavo bhagavato bhāṣitam abhyanandam |

dhvajāgrasūtraṃ | samāptaḥ ||