Naḍakalāpikasūtra

bhagavān rājagṛhe viharati veṇuvane kalandakanivāpe |

tena khalu samayenāyuṣmāñ chāriputra āyuṣmāṃś ca mahākoṣṭhilo rājagṛhe viharato gṛdhrakūṭe parvate |

athāyuṣmāñ chāriputraḥ sāyāhne pratisaṃlayanād vyutthāya yenāyumān mahākoṣṭhilas tenopajagāma | upetyāyuṣmatā mahākoṣṭhilena sārdhaṃ saṃmukhaṃ sammodanīṃ saṃrañjanīṃ kathāṃ vividhām upasaṃhṛtyaikānte nyaṣīdat | ekāntaniṣaṇṇa āyuṣmāñ chāriputra āyuṣmantaṃ mahākoṣṭhilam idam avocat |

pṛcchāma āyuṣman mahākoṣṭhila kañcid eva pradeśam | saced avakāśaṃ kuryāḥ praśnasya vyākaraṇāya |

pṛcchāyuṣmañ chāriputra | śrutvā te vedayiyāmi |

a kin nv āyuṣman mahākoṣṭhila asti jarā | asty evāyuṣmañ chāriputra jarā |

b kin nv āyuṣman mahākoṣthila asti maraṇam | asty evāyuṣmañ chāriputra maraṇam |

kin nv āyuṣmān mahākoṣṭhila svayaṃkṛtaṃ jarāmaraṇam | aho svit parakṛtam | aho svit svayaṃkṛtañ ca parakṛtañ ca | aho svid asva­yaṃ­kāraparakārahetusamutpannaṃ jarāmaraṇam |

na hy evāyuṣmañ chāriputra svayaṃkṛtaṃ jarāmaraṇam | na parakṛtaṃ | na svayaṃkṛtañ ca parakṛtañ ca | nāpy asvayaṃkāraparakārahetusamutpannaṃ jarāmaraṇam | api tu jātipratyayaṃ jarāmaraṇam |

evaṃ jātir bhava upādāna tṛṣṇā vedanā sparśaḥ ṣaḍā­yatanaṃ nāmarūpaṃ vācyam |

kin nv āyuṣman mahākoṣṭhila sva­yaṃ­kṛtaṃ nāmarūpam | aho svit parakṛtaṃ | aho svit svayaṃkṛtañ ca parakṛtañ ca | aho svid asva­yaṃ­kāraparakārahetusamutpannaṃ nāmarūpam |

na hy evāyuṣmañ chāripurta svayakṛtaṃ nāmarūpam | na parakṛtaṃ | na svayaṃkṛtañ ca parakṛtañ ca | nāpy asva­yaṃ­kāraparakārahetusamutpannaṃ nāmarūpam | api tu vijñānapratyaya nāmarūpam |

kin nv āyuṣman mahākoṣṭhila svayaṃkṛtaṃ vijñānam | aho svit parakṛtam | aho svit svayaṃkṛtañ ca parakṛtañ ca / aho svid asva­yaṃ­kāraparakārahetusamutpannaṃ vijñānam | na hy evāyuṣmañ chāriputra svayaṃkṛtaṃ vijñānam | na parakṛtaṃ / na svayaṃkṛtañ ca parakṛtañ ca | nāpy asva­yaṃ­kāraparakārahetusamutpannaṃ vijñānam / api tu nāmarūpapratyayaṃ vijñānam |

idānīm evaṃ vayam āyuṣmato mahākoṣthilasya bhāṣitasyārtham ājānīmaḥ |

na svayaṃkṛtaṃ nāmarūpaṃ | na parakṛtaṃ | na svayaṃkṛtañ ca paraktañ ca / nāpy asva­yaṃ­kāraparakārahetusamutpannaṃ nāmarūpam | api tu vijñānapratyayaṃ nāmarūpam | idānīṃ ca punar nāmarūpapratyayaṃ vijñānam ity ājānīmaḥ | ko nv āyuṣman mahākoṣṭhila asya bhāṣitasyārtho draṣṭavyaḥ |

tenāsyāyuṣmañ chāriputra upamāṃ te kariṣyāmi | upamayā hy atraikatyā vjñapuruṣā bhāṣitasyārtham ājānanti |

tadyathā dvau naḍakalāpāv ākāśe ucchṛtau syātām anyonyaṃ niśṛtau | a etāv anyonyaṃ niśṛtya tiṣṭhataḥ | yaduta vijñānapratyayaṃ nāmarūpam | nāmarūpapratyayaṃ vijñānam |

sādhu sādhv āyuṣman mahākoṣṭhila yathā śrutavatāryaśrāvakeṇa samyag eva śāstuḥ śāsanam ājānatā suvinītena viśāradenāmṛtadṛśā amṛtaṃ dhātuṃ kāyena sākṣīkṛtvopa­saṃ­padya viharatāyuṣmatā mahākoṣṭhilena imā evaṃrūpā gaṃbhīrā gaṃbhīrā praśnā vimṛśya vimṛśya samyakprajñayā pṛṣṭena vyākṛtāḥ |

cailoṇḍukam ivāyuṣmantaṃ mahākoṣṭhilaṃ ye sabrahmacāriṇo mūrdhnā pariharanta āyuṣmato mahākoṣṭhilasya labherañ ca darśanaṃ labherañ ca paryupāsanaṃ teṣā syur lābhāḥ sulabdhāḥ | asmākam api lābhāḥ sulabdhā ye vayam āyuṣmato mahākoṣṭhilasya labhāmahe ca darśanaṃ labhāmahe ca paryupāsanam |

sādhv atyuṣmatā mahākoṣṭhilena dharmaparyāyo deśitaḥ | imam aham utsahāmi triṃśat

jarā­maraṇasya āyuṣman mahākoṣṭhila bhikṣur nirvide virāgāya nirodhāya dharma deśayati dharmakathiko bhikṣur alam asya vacanāya | jāti­bhavo­pād­ānatṛṣṇāvedanāsparśaṣaḍā­yata­nanāmarūpavijñānasya bhikṣur nirvide virāgāya nirodhāya dharmaṃ deśayati dharmakathiko bhikṣur alam asya vacanāya |

jarā­maraṇasya bhikṣur nirvide virāgāya nirodhāya pratipanno bhavati dharmakathiko bhikṣur alam asya vacanāya |yāvad vijñānasya bhikṣur nirvide virāgāya nirodhāya pratipanno bhavati dharmakathiko bhikṣur alam asya vacanāya |

jarā­maraṇasya bhikṣur nirvide virāgāya nirodhāyānu­pād­āyāsravebhyaḥ samyaksuvimuktacitto bhavati dharmakathiko bhikṣur alam asya vacanāya | yāvad vijñānasya bikṣur nirvide virāgāya nirodhāyānu­pād­āyāsravebyaḥ samyaksuvimuktacitto bhavati dharmakathiko bhikṣur alam asya vacanāya |

sādhu sādhv āyuṣmañ chāriputra yathā śrutavatāryaśrāvakeṇa samyag eva śāstuḥ śāsanam ājānatā suvinītena viśāradenāmṛtadṛśā

pūrvavad yāvat paryusanam |

atha kin nv asyottare karaṇīyam iti tau satpuruṣāv anyonyabhāṣitam abhinandyānumodya utthāyāsānāt prakrāntau ||