Acelasūtra

bhagavān rājagṛhe viharati gṛdhrakūṭe parvate |

atha bhagavān pūrvāhṇe nivasya pātracīvaram ādāya gṛdhrakūṭaparvatād avatīrṇo rājagṛhaṃ piṇḍāya prāviśat |

tena khalu samayenācelakāśyapo rājagṛhaṃ gocarāya prasṛto ’bhūt kenacid eva karaṇīyena | adrākṣīd acelakāśyapo bhagavantaṃ dūrata eva | dṛṣṭvā ca punar yena bhagavāṃs tenopajagāma | upetya bhagavantam idam avocat |

pṛcchāma bho gautama kañcid eva pradeśam | saced avakāśaṃ kuryāt praśnasya vyākaraṇāya |

akālas tāvat tava kāśyapa praśnasya vyākaraṇāya | rājaghaṃ tāvat piṇḍāya caritavyam | bahir ārāmaṃ gaccha | tatra te kālo bhaviṣyati praśnasya vyākaraṇāya |

dvir apy evam eva vācyam |

trir apy acelakāśyapo bhagavantam idam avocat | syād bho gautamāsmākaṃ vāntarāyo bhavati gautamasyānyathātvam | ihaiva vayaṃ bhavantaṃ gautamaṃ pṛcchāmaḥ | saced avakāśaṃ kuryā praśnasya vyākaraṇāya |

pṛccha kāśyapa yad yad evākāṅkṣase |

kin nu bho gautama svayaṃkṛtaṃ duḥkham | avyākṛtam idaṃ mayā kāśyapa svayaṃkṛtaṃ duḥkham |

kin nu bho gautama parakṛtaṃ duḥkham | etad api kāśyapa avyākṛtaṃ mayā parakṛtaṃ duḥkham |

kin nu bho gautama svayaṃkṛtañ ca parakṛtañ ca duḥkham | etad api kāśyapa avyākṛtaṃ mayā svayaṃkṛtañ ca parakṛtañ ca duḥkham |

kin nu bho gautama asva­yaṃ­kāraparakārahetusamutpannaṃ duḥkham | etad api kāśyapa avyākṛtaṃ mayā asva­yaṃ­kāraparakārahetusamutpannaṃ duḥkham |

kin nu bho gautama svayaṃkṛtaṃ duḥkham iti pṛṣṭo ’vyākṛtam iti vadasi parakṛtaṃ svayaṃkṛtañ ca parakṛtañ ca asva­yaṃ­kāraparakārahetusamutpannaṃ duḥkham iti pṛṣṭo ’vyākṛtam iti vadasi | kin nu bho gautama nāsty eva duḥkham |

na kāśyapa nāsty eva duḥkham iti tv asty eva duḥkham |

sādhu me bhavān gautamas tathā dharmaṃ deśayatu yathāhaṃ duḥkhaṃ jāneyaṃ duḥkhaṃ paśyeyam |

sā eva kāśyapa vedanā sa vettīti yasyaivaṃ syāt svayaṃkṛtaṃ duḥkham evam ahaṃ na vadāmi |

anyā vedanā anyo vettīti yasyaivaṃ syāt parakṛtaṃ duḥkham evam ahaṃ na vadāmi |

vedanābhibhūtasyaivā sataḥ pare duḥkhaṃ samavadadhatīti yasyaivaṃ syāt svayaṃkṛtañ ca parakṛtañ ca duḥkham evam apy ahaṃ na vadāmi |

asatsu ca pratyayeṣu duḥkhāni santīti yasyaivaṃ syād asva­yaṃ­kāraparakārahetusamutpannaṃ duḥkham evam ahaṃ na vadāmi |

ity etāv ubhāv antāv anupagamya madhyamayā pratipadā tathāgato dharmaṃ deśayati | yad utāsmin satīdaṃ bhavaty asyotpādād idam utpadyate pūrvavad yāvat samudayo nirodhaś ca bhavati |

asmin khalu dharmaparyāye bhāṣyamāṇe ’celakāśyapasya virajo vigatamalaṃ dharmeṣu dharmacakṣur utpannam |

athācelakāśyapo dṛṣṭadharmā prāptadharmā viditadharmā paryavagāḍhadharmā tīrṇakāṅkṣas tīrṇavicikitso ’parapratyayo ’nanyaneyaḥ śāstuḥ śāsane dharmeṣu vaiśāradyaprāpto yena bhagavāṃs tenāñjaliṃ praṇamya bhagavantam idam avocat |

abhikkrānto ’haṃ bhadanta abhikkrāntaḥ | eṣo ’haṃ bhagavantaṃ śaraṇaṃ gacchāmi dharmaṃ ca bhikṣusaṃghaṃ ca | upāsākaṃ ca māṃ dhārayādyāgreṇa yāvajjīvaṃ prāṇopetaṃ śaraṇagatam abhiprasannam |

athācelakāśyapo bhagavato bhāṣitam abhinandyānumodya bhagavatpādau śirasā vanditvā bhagavato ’ntikāt prakrāntaḥ |

athācelakāśyapo ’ciraprakrānto bhagavato ’ntikād gavā taruṇavatsayā jīvitād vyaparopitaḥ | tasya maraṇasamaye viprasannānīndriyāṇi pariśuddho mukhavarṇaḥ paryavadātas tvagvarṇaḥ |

atha saṃbahulā bhikṣavaḥ pūrvāhṇe nivasya pātracīvaram ādāya rājagṛhaṃ piṇḍāya prāviśan | aśrauṣuḥ saṃbahulā bhikṣavo rājagṛhaṃ piṇḍāya carantaḥ | yo ’sāv acelakāśyapo bhagavantaṃ rājagṛhe praśnaṃ pṛṣṭavān so ’ciraprakrānto bhagavato ’ntid gavā taruṇavatsayā jīvitād vyaparopitaḥ | tasya maraṇasamaye viprasannānīndriyāṇi pariśuddho mukhavarṇaḥ paryavadātas tvagvarṇaḥ |

śrutvā ca punā rājagṛhaṃ piṇḍāya caritvā kṛtabhaktakṛtyāḥ paścādbhaktapiṇḍapātaṃ pratikrāntāḥ | pātracīvaraṃ pratiśamya pādau prakṣālya yena bhagavāṃs tenopajagmuḥ | upetya bhagavatpādau śirasā vanditvaikānte nyaṣīdan | ekāntaniṣaṇṇāḥ saṃbahulā bhikṣavo bhagavantam idam avocan |

iha vayaṃ bhadanta saṃbahulā bhikṣavaḥ pūrvāhṇe nivasya pātracīvaram ādāya rājagṛhaṃ piṇḍāya prāviśāma | aśrauṣma vayaṃ saṃbahulā bhikṣavo rājagṛhaṃ piṇḍāya carantaḥ pūrvavad yāvat paryavadātas tvagvarṇaḥ | tasya bhadanta kā gatiḥ kopapattiḥ ko ’bhisaṃparāyaḥ |

dravyajātīyaḥ sa bhikṣavaḥ kulaputraḥ | pratyabhijñāsīc ca me dharmeṣv anudharmam | na ca me viheṭhitavān dharmādhikārikīṃ kathāṃ vyākṛtā sa kulaputraḥ | kuruta tasya śarīre śarīrapūjām iti |

tatra bhagavān acelakāśyapaṃ paramaṃ vyākaraṇam akārṣīt ||