Bhūmikasūtra

bhagavān rājagṛhe viharati veṇuvane kalandakanivāpe |

tena khalu samayenāyuṣmān bhūmiko rājagṛhe viharati gṛdhrakūṭe parvate |

atha sabahulā anyatīrthikaparivrājakā yenāyuṣmān bhūmikas tenopajagmuḥ | upetyāyuṣmatā bhūmikena sārdhaṃ saṃmukhaṃ saṃmodanīṃ saṃrañjanīṃ kathāṃ vividhām upasaṃhṛtyaikānte nyaṣīdan | ekāntanisaṇṇāḥ saṃbahulā anyatīrthikaparivrājakā āyuṣmantaṃ bhūmikam idam avocan |

pṛcchāma bho bhūmika kañcid eva pradeśam | saced avakāśaṃ kuryāḥ praśnasya vyākaraṇāya |

pṛcchata bhavantaḥ | śrutvā te vedayiṣyāmi |

kin nu bho bhūmika svayaṃkṛtaṃ sukhaduḥkham | avyākṛtam ida bhadanta bhagavatā svayaṃkṛtaṃ sukhaduḥkham |

kin nu bho bhūmika paraktaṃ svayaṃkṛtañ ca parakṛtañ ca asva­yaṃ­kāraparakārahetusamutpannaṃ sukhaduḥkham | etad api bhadanta avyākṛtaṃ bhagavatā parakṛtaṃ svayaṃkṛtañ ca parakṛtañ ca asva­yaṃ­kāraparakārahetusamutpannaṃ sukha­duḥkham |

kin nu bho bhūmika svayaṃkṛtaṃ sukhaduḥkham iti pṛṣṭo ’vyākṛtam iti vadasi | parakṛtaṃ svayaṃkṛtañ ca parakṛtañ ca asva­yaṃ­kāraparakārahetusamutpannaṃ sukhaduḥkham iti pṛṣṭo ’vyākṛtam iti vadasi | kathaṃ samutpannaṃ bhagavatā gautamena sukhaduḥkhaṃ prajñaptam |

pratītyasamutpannaṃ bhavanto bhagavatā sukhaduḥkhaṃ prajñaptam |

atha sabahulā anyatīrthikaparivrājakā āyuṣmato bhūmikasya bhāṣitaṃ nābhinandanti na pratikrośanti | anabhinandyāprakrośāś cotthāyāsanāt prakrāntāḥ |

tena khalu samayenāyuṣmāñ chāriputra āyuṣmato bhūmikasyatidūre niṣaṇṇo ’bhūd anyataraṃ vṛkṣamūlaṃ niśritya |

athāyuṣmān bhūmiko ’ciraprakrāntān saṃbahulān anyatīrthikaparivrājakān viditvā yenāyuṣmāñ chāriputras tenopajagāma | upetya yāvad evāsyābhūt sabahu­lair anyatīrthikapariv­rāja­kaiḥ sārdham antarākathāsamudāhāras tat sarvam āyuṣmataḥ śāriputrasya vistareṇārocayati | evaṃ cāha |

kaścid aham evam āyuṣmañ chāriputra vyākurvāṇo no ca bhagavantam abhyācakṣe | nātisarāmi | uktavādī cāhaṃ bhagavato dharmavādī ca | dharmasya cānudharmaṃ vyākaromi | na ca me kaścid āgacchet parataḥ sahadharmeṇa vādānuvādaṃ garhasthānīyo dharmaḥ |

tatthyaṃ tvam āyuṣman bhūmīka vyākurvāṇo no ca bhagavantam abhyākhyāsīḥ | nātisarasi | uktavādī ca tvaṃ bhagavato dharmavādī ca | dharmasya cānudharmaṃ vyākaroṣi | na ca te kaścid āgacchet parataḥ sahadharmeṇa vādānuvādaṃ garhasthānīyo dharmaḥ |

tat kasmād dhetoḥ | pratītyasamutpannam āyuṣman bhūmika bhagavatā sukhaduḥkhaṃ prajñaptam |

tatrāyuṣman bhūmika ye te śramaṇabrāhmaṇāḥ svayaṃkṛtaṃ sukhaduḥkhaṃ prajñapayanti tad api pratītyasamutpannam | tad bata pratītyasamutpannaṃ bhaviṣyati | nedaṃ sthānaṃ vidyate |

parakṛtaṃ svayaṃkṛtañ ca parakṛtañ ca asva­yaṃ­kāraparakārahetusamutpannaṃ sukhaduḥkhaṃ prajñapayanti tad api pratītyasamutpannam | tad bata pratītyasamutpannaṃ bhaviṣyeti | nedaṃ sthānaṃ vidyate |

tatrāyuṣman bhūmika ye te śramaṇabrāhmaṇāḥ svayaṃkṛtaṃ sukhaduḥkhaṃ prajñapayanti tad api sparśapratyayam | tad bata anyatrasparśāt pratisaṃvedayiṣyanti | nedaṃ sthānaṃ vidyate |

parakṛtaṃ svayaṃkṛtañ ca parakṛtañ ca asvayakāraparakārahetusamutpannaṃ sukhaduḥkhaṃ prajñāpayanti tad api sparśapratyayam | tad bata anyatrasparśāt pratisaṃ­vedayiṣyanti | nedaṃ sthānaṃ vidyate |

tena khalu samayenāyuṣmān ānanda āyuṣmataḥ śāriputrasya nātidūre niṣaṇṇo ’bhūd anyataraṃ vṛkṣamūlaṃ niśritya |

athāyumān ānando yāvad evābhūd āyuṣmato bhūmikasyāyuṣmatā śāriputreṇa sārdham antarākathāsamudāhāras tat sarvam udgṛhya paryavāpya yena bhagavāṃs tenopajagāma | upetya bhagavatpādau śirasā vanditvaikānte ’sthāt | ekāntasthita āyuṣmān ānando vad evābhūd āyuṣmato bhūmikasyāyuṣmatā śāriputreṇā sārdham antarākathāsamudāhāras tat sarvaṃ bhagavato vistareṇārocayati |

evam ukto bhagavān āyuṣmantam ānandam idam avocat | sādhu sādhv ānanda paṇḍitaḥ śāriputro bhikṣuḥ | kālagatena praśnaḥ samyakprajñayā pṛṣṭena vyākṛtaḥ | icchāmi kaś ca śrāvakaḥ kālagatena prnaṃ pṛṣṭo vyākuryāt tadyathā śāriputreṇa bhikṣuṇā vyākṛtaḥ |

eko ’yaṃ samayaḥ | rājagṛhe viharāmi girivraje | tatra mamānyatīrthikāḥ parivrājakā etad evārtham ebhiḥ padair ebhir vyañjanaiḥ praśnaṃ pṛṣṭavantaḥ | teṣāṃ mayā eṣa evārtho ebhiḥ padair ebhir vyañjanaiḥ praśnaḥ pṛṣṭena vyākṛtas tadyathā śāriputreṇa bhikṣuṇā |

tatra ye kecic chramaṇabrāhmaṇāḥ svayaṃkṛtaṃ sukhaduḥkhaṃ prajñapayanti tān aham upasaṃkramāmi | upasaṃkramyaivaṃ vadāmi | satyaṃ kila bhavantaḥ svayaṃkṛtaṃ sukhaduḥkhaṃ prajñapayanti | te mayā pṛṣṭā evam iti pratijānanti | tān aham evaṃ vadāmi | asty etad bhadanta evam ucyate | yat punar atra bhavantaḥ sthāmaśaḥ parāmṛśyābhiniviśyānuvyavaharanti | idam eva satyaṃ moham anyat | idam atrāhaṃ nānujānāmi |

tat kasmād dhetoḥ | anyathāsamutpannaṃ mayā bhavantaḥ sukhaduḥkhaṃ prajñaptam | te mama pṛcchanti | kathaṃ samutpannaṃ bhagavatā gautamena sukhaduḥkham prajñaptam | tān aham evaṃ vadāmi | pratītyasamutpannaṃ mayā sukhaduḥaṃ prajñaptam |

evaṃ parakṛtaṃ svayaṃkṛtañ ca parakṛtañ ca asvayaṃkāraparakārahetusamutpannaṃ sukhadukhaṃ prajñapayanti tān aham upasaṃkramāmi pūrvavad yāvat |

yathā khalv ahaṃ bhadanta bhagavato bhāṣitasyārtham ājānāmi jātyāṃ satyāṃ jarāmaraṇaṃ bhavati | nānyatra­jātipratyayaṃ jarāmaraṇam | yāvad avidyāyāṃ satyāṃ saṃskārā bhavanti | nānyatrāvidyāpratyayāḥ saṃskārāḥ |

evaṃ nirodho vācyaḥ |

etad eva bhagavān āyuṣmata ānandasya pratyācārayati |