Ekottarikāgama 3

nāham ekadharmam api samanupaśyāmi yad evam adāntam aguptam arakṣitam asaṃvṛtam abhāvitam āyatyāṃ duḥkhavipākaṃ bhavati yathedaṃ cittam | cittaṃ hi bhikṣavaḥ adāntam aguptam arakṣitam asaṃvṛtam abhāvitam āyatyāṃ duḥkhavipākaṃ bhavati |

tasmāt tarhy evaṃ śikṣitavyaṃ yan na naś cittam adāntam aguptam arakṣitam asaṃvṛtam abhāvitam āyatyāṃ duḥkhavipākaṃ bhaviṣyati evaṃ vo bhikṣavaḥ śikṣitavyaṃ ||

nāham ekadharmam api samanupaśyāmi yad evam sudāntaṃ suguptaṃ surakṣitaṃ susaṃvṛtaṃ subhāvitam āyatyāṃ sukhavipākaṃ bhavati yathedaṃ cittam | cittaṃ hi bhikṣavaḥ sudāntaṃ suguptaṃ surakṣitaṃ susaṃvṛtaṃ subhāvitam āyatyāṃ sukhavipākaṃ bhavati |

tasmāt tarhy evaṃ śikṣitavyaṃ yac cittaṃ naḥ sudāntaṃ suguptaṃ surakṣitaṃ susaṃvṛtaṃ subhāvitam āyatyāṃ sukhavipākaṃ bhaviṣyaty evaṃ vo bhikṣavaḥ śikṣitavyaṃ ||

yathā duḥkhavipākaṃ sukhavipākam eva anarthāya arthāya ahitāya hitāya duḥkhāya sukhāya vyasanāya saṃpade vipattaye saṃpattaye asamṛddhaye samṛddhaye apāripūraye pāripūraye pārihāṇāya apārihāṇāya || ||

nāham ekadharmam api samanupaśyāmi yad evam adāntam aguptam arakṣitam asaṃvṛtam abhāvitaṃ saṃrāgāya saṃvartate yathedaṃ cittam | cittaṃ hi bhikṣavaḥ adāntam aguptam arakṣitam asaṃvṛtam abhāvitaṃ saṃrāgāya saṃvartate |

tasmāt tarhy evaṃ śikṣitavyaṃ yan na naś cittam adāntam aguptam arakṣitam asaṃvṛtam abhāvitaṃ saṃrāgāya saṃvartsyati evaṃ vo bhikṣavaḥ śikṣitavyaṃ ||

nāham ekadharmam api samanupaśyāmi yad evam sudāntaṃ suguptaṃ surakṣitaṃ susaṃvṛtaṃ subhāvitam asaṃrāgāya saṃvartate yathedaṃ cittaṃ | cittaṃ hi bhikṣavaḥ sudāntaṃ suguptaṃ surakṣitaṃ susaṃvṛtaṃ subhāvitam asaṃrāgāya saṃvartate |

tasmāt tarhy evaṃ śikṣitavyaṃ yac cittaṃ naḥ sudāntaṃ suguptaṃ surakṣitaṃ susaṃvṛtaṃ subhāvitam asaṃrāgāya saṃvartsyati evaṃ vo bhikṣavaḥ śikṣitavyaṃ ||

yathā saṃrāgāya asaṃrāgāya evaṃ sadveṣāya asadveṣāya saṃmohāya asaṃmohāya saṃyogāya visaṃyogāya sakleśāya vyavadānāya ācayāya apacayāya upādānāya anupādānāya ucchedāya anucchedāya saṃśreṇanāya viśreṇanāya saṃdhūpanāya vidhūpanāya bāhulyāya saṃlekhāya saṃsargāya asaṃsargāya prapañcāya niṣprapañcāya ālayāya anālayāya avyupaśamāya vyupaśamāya || ||