Ekottarikāgama 4

tadyathā śāliśūko vā yavaśūko vā mithyāduṣpraṇihitaḥ syāt | taṃ śūkaṃ strī vā puruṣo vā sukumāraḥ sukhaiṣī padbhyām anvākrameta | sa tasya abhavyas tvacaṃ bhitvā rudhiram utpādayituṃ | tat kasya hetor | mithyāduṣpraṇihitatvāc chūkasya |

evam eva sa bata mithyāduṣpraṇihitena cittena ātmārthaṃ vā jñāsyati parārthaṃ vā ubhayārthaṃ vā uttaraṃ vā manuṣyadharmam alamāryaviśeṣādhigamaṃ jñānaṃ vā darśanaṃ vā sparśavihāratāṃ vā jñāsyati vā drakṣyati vā nedaṃ sthānaṃ vidyate | tat kasya hetor | mithyāduṣpraṇihitatvāc cittasya |

tasmāt tarhy evaṃ śikṣitavyaṃ yan na naḥ cittaṃ mithyāduṣpraṇihitaṃ bhaviṣyaty evaṃ vo bhikṣavaḥ śikṣitavyaṃ ||

tadyathā śāliśūko vā yavaśūko vā samyaksupraṇihitaḥ syāt | taṃ śūkaṃ strī vā puruṣo vā sukumāraḥ sukhaiṣī padbhyām anvākrameta | sa tasya bhavyas tvacaṃ bhitvā rudhiram utpādayituṃ | tat kasya hetoḥ | samyaksupraṇihitatvāc chūkasya |

evam eva sa bata samyaksupraṇihitena cittena ātmārthaṃ vā jñāsyati parārthaṃ vā ubhayārthaṃ vā uttaraṃ vā manuṣyadharmam alamāryaviśeṣādhigamaṃ jñānaṃ vā darśanaṃ vā jñāsyati vā drakṣyati vā sthānam etad vidyate | tat kasya hetor | ṛju samyaksupraṇihitatvāc cittasya |

tasmāt tarhy evaśikṣitavyaṃ yan naś cittaṃ samyaksupraṇihitaṃ bhaviṣyaty evaṃ vo bhikṣavaḥ śikṣitavyaṃ || ||