Ekottarikāgama 10

tadyathā ādarśaḥ apariśuddha syād aparyavadātaḥ a­pari­karmīkṛtaḥ | tatra cakṣuṣmān puruṣaḥ svaṃ mukhanimittaṃ pratyavekṣamāṇo na paśyet | tat kasya hetor | apariśuddhatvād ādarśasya |

evam eva sa bata apariśuddhena cittena aparyavadātena a­pari­karmīkṛtena ātmārthaṃ vā jñāsyati parārthaṃ vā ubhayārthaṃ vā uttaraṃ vā manuṣyadharmam alamāryaviśeṣādhigamaṃ vā jñānaṃ vā darśanaṃ vā sparśavihāratāṃ vā jñāsyati vā drakṣyati vā nedaṃ sthānaṃ vidyate | tat kasya hetor | apariśuddhatvāc cittasya |

tasmāt tarhy evaṃ śikṣitavyaṃ yan na naś cittam apariśuddhaṃ bhaviṣyaty evaṃ vo bhikṣavaḥ śikṣitavyaṃ ||

tadyathā ādarśaḥ pariśuddhaḥ syāt paryavadātaḥ suparikarmīkṛtaḥ | tatra cakṣuṣmān puruṣaḥ svaṃ mukhanimittaṃ pratyavekṣamāṇaḥ paśyet | tat kasya hetor | supariśuddhatvād ādarśasya |

evam eva sa bata pariśuddhena cittena paryavadātena suparikarmīkṛtena ātmārthaṃ vā jñāsyati parārthaṃ vā ubhayārthaṃ vā uttaraṃ vā manuṣyadharmam alamāryaviśeṣādhigamaṃ jñānaṃ vā darśanaṃ vā sparśavihāratāṃ vā jñāsyati vā drakṣyati vā sthānam etad vidyate | tat kasya hetor | supariśuddhatvāc cittasya |

tasmāt tarhy evaṃ śikṣitavya yac cittaṃ naḥ supariśuddhaṃ bhaviṣyati paryavadātaṃ evaṃ vo bhikṣavaḥ śikṣitavyaṃ || ||