Ekottarikāgama 17

nāham ekadharmam api samanupaśyāmi yena anutpannāś ca kuśalā dharmā notpadyante utpannāś ca prahīyante anutpannā akuśalā dharmā utpadyante utpannāś ca bhūyobhāvavṛddhivipulatāṃ gacchanti yathā pāpamitratayā pāpasahāyatayā pāpasaṃparkatayā | tat kasya hetoḥ | pāpamitrasya hi bhikṣor viharataḥ pāpasahāyasya pāpasaṃparkasya anutpannāś ca kuśalā dharmā notpadyante utpannāś ca prahīyante anutpannāḥ pāpakā akuśalā dharmā utpadyante utpannāś ca bhūyobhāvavṛddhivipulatāṃ gacchanti ||

nāham ekadharmam api samanupaśyāmi yena anutpannāś ca pāpakā akuśalā dharmā notpadyante utpannāś ca prahīyante anutpannāḥ kuśalā dharmā utpadyante utpannāś ca bhūyobhāvavṛddhivipulatāṃ gacchanti yathā kalyāṇamitratayā kalyāṇasahāyatayā kalyāṇasaṃparkatayā | tat kasya hetoḥ | kalyāṇamitrasya hi bhikṣor viharataḥ kalyāṇasahāyasya kalyāṇasaṃparkasya anutpannāś ca pāpakā akuśalā dharmā notpadyante utpannāś ca prahīyante anutpannāḥ kuśalā dharmā utpadyante utpannāś ca bhūyobhāvavṛddhivipulatāṃ gacchanti ||

yathā pāpamitratayā kalyāṇamitratayā evaṃ ayoniśo manasīkāreṇa yoniśo manasīkāreṇa evaṃ kauśīdyena vīryāraṃbena pramādena apramādena mithyādṛṣṭyā samyagdṛṣṭyā ||

mithyādṛṣṭiḥ param avadyānāṃ | tat kasya hetor | mithyādṛṣṭeḥ puruṣapudgalasya yac ca kāyakarma tathādṛṣṭeḥ yad vākkarma yā cetanā yā prārthanā yaḥ praṇidhir ye ca saṃskārās tanmayāḥ sarve ’sya te dharmā aniṣṭatvāya saṃvartante akāntatvāya apriyatvāya amanāpatvāya amanojñatvāya anabhipretatvāya saṃvartante | tat kasya hetor | dṛṣṭir hi pāpikā yaduta mithyādṛṣṭiḥ |

tadyathā bhikṣavas tiktāny alābubījāni vā nimbabījāni vā kāśātakībījāni vā sukṣetre ropitāni syuḥ susnigdhe vā pṛthivīpradeśe upanikṣiptāni tāni yaṃ yam eva pṛthivyāḥ pṛthivīrasam ādadate adbhya abrasaṃ tejasas tejorasaṃ vāyor vāyurasaṃ sarve ’sya te rasās tiktatvāya saṃvartante kaṭukatvāya asvādutvāya | tat kasya hetor | bījāni hi tiktāni kaṭūny asvādūni |

evam eva mithyādṛṣṭir bhikṣavaḥ param avadyānāṃ | mithyādṛṣṭeḥ puruṣapudgalasya yac ca kāyakarma tathādṛṣṭeḥ yad vākkarma yā cetanā yā prārthanā yaḥ praṇidhir ye ca saṃskārās tanmayāḥ sarve ’sya te dharmā aniṣṭatvāya saṃvartante akāntatvāya apriyatvāya amanāpatvāya amanojñatvāya anabhipretatvāya saṃvartante | tat kasya hetor | dṛṣṭir hi bhikṣavaḥ pāpikā yaduta mithyādṛṣṭiḥ |

samyagdṛṣṭiḥ bhikṣavaḥ param anavadyānāṃ | tat kasya hetoḥ | samyagdṛṣṭe puruṣapudgalasya yac ca kāyakarma tathādṛṣṭeḥ yad vākkarma yā cetanā yā prārthanā yaḥ praṇidhir ye ca saṃskārās tanmayāḥ sarve ’sya te dharmā iṣṭatvāya saṃvartante kāntatvāya priyatvāya manāpatvāya manojñatvāya abhipretatvāya saṃvartante | tat kasya hetor | dṛṣṭir hi bhikṣavo bhadrikā yaduta samyagdṛṣṭiḥ |

tadyathā ikṣubījāni vā śālibījāni vā mṛdvikābjāni vā sukṣetre ropitāni syuḥ susnigdhe vā pṛthivīpradeśe upanikṣiptāni tāni yaṃ yam eva pṛthivyāḥ pṛthivīrasam ādadate adbhyaḥ abrasaṃ tejasas tejorasaṃ vāyor vāyurasaṃ sarve ’sya te rasā atiktatvāya saṃvartante akaṭukatvāya svādutvāya | tat kasya hetor | bījāni hi atiktāny akaṭūni svādūni |

evam eva samyagdṛṣṭiḥ param anavadyānāṃ | tat kasya hetoḥ | samyagdṛṣṭeḥ puruṣapudgalasya yac ca kāyakarma tathādṛṣṭeḥ yad vākkarma yā cetanā yā prārthanā yaḥ praṇidhir ye ca saṃskārās tanmayāḥ sarve ’sya te dharmā iṣṭatvāya saṃvartante kāntatvāya priyatvāya manāpatvāya manojñatvāya abhipretatvāya saṃvartante | tat kasya hetor | dṛṣṭir hi bhikṣavo bhadrikā yaduta samyagdṛṣṭiḥ |

hīnān dharmān na seveta pramādena na saṃvaset |
mithyādṛṣṭin na roceta na bhavel lokavardhanaḥ ||

samyagdṛṣṭir adhīmātrā laukikī yasya vidyate | ||adhimātrā
api jātisahasrāṇi nāsau gacchati durgatiṃ || ||

uddānaṃ |
ahitaṃ dānadauḥśīlyaṃ śīlaṃ manomayadvayaṃ |
puṇyaṃ tathāṣṭikāṃ kṛtvā kṣatikābhiś caturdaśa ||