Ekottarikāgama 26

parṣat kaṣāyaṃ ca vo bhikṣavo deśayiṣyāmi parṣanmaṇḍaṃ ca tac chṛṇuta sādhu ca suṣṭhu ca manasikuruta bhāṣiṣye |

parṣatkaṣāyaḥ katamaḥ | yasyāṃ parṣadi adharmo dīpyate dharmaḥ pratyuhyate avinayo dīpyate vinayaḥ pratyuhyate adharme khalu dīpyamāne dharme pratyuhyamāne avinaye dīpyamāne vinaye pratyuhyamāne adharmavādinaḥ avinayavādinaḥ pudgalā balavanto bhavanti dharmavādino vinayavādinaḥ pudgalāḥ durbalā bhavanti adharma­vādiṣu avinayavādiṣu pudgaleṣu balavatsu dharmavādino vinayavādinaḥ pudgalās tūṣṇīṃ vāsaṃ vasanti utthāya vā viprakrāmanti | ayam ucyate parṣat kaṣāyaḥ |

parṣanmaṇḍaḥ katamaḥ | yasyāṃ parṣadi dharmo dīpyate adharmaḥ pratyuhyate vinayo dīpyate avinayaḥ pratyuhyate dharme khalu dīpyamāne adharme pratyuhyamāne vinaye dīpyamāne avinaye pratyuhyamāne dharmavādino vinayavādinaḥ pudgalā balavanto bhavanti adharmavādina avinayavādinaḥ pudgalā durbalā bhavanti dharmavādiṣu vinayavādiṣu pudgaleṣu bala­vatsu adharmavādina avinayavādinaḥ pudgalāḥ pratyantān vā bhajante sarveṇa vā sarvaṃ na bhavanti | ayam ucyate parṣanmaṇḍaḥ |

parṣatkaṣāyaṃ ca vo deśayiṣyāmi parṣanmaṇḍaṃ ceti me yad uktam idaṃ me tat pratyuktam ||

anagravatīṃ ca vaḥ parṣadaṃ deśayiṣyāmi agravatīṃ ca | tac chṛṇuta sādhu ca suṣṭhu ca manasikuruta bhāṣiṣye |

anagravatī parṣat katamā | yasyāṃ parṣadi navakā bhikṣavaḥ sthavireṣu bhikṣuṣu agauravā viharanty apratīśā abhayavaśavartinaḥ sthavirāś ca bhikṣavaḥ śaithilikā bhavanti bāhulikā avakramaṇīye pūrvaṃgamā praviveke nikṣiptadhurāḥ śikṣāyāṃ mandagauravāḥ | iyam ucyate anagravatī parṣat |

agravatī parṣat katamā | yasyāṃ parṣadi navakā bhikṣavaḥ sthavireṣu bhikṣuṣu sagauravā viharanti sapratīśāḥ sabhayavaśavartinaḥ sthavirāś ca bhikṣavaḥ na śaithilikā bhavanti abāhulikāḥ avakramaṇīye nikṣiptadhurāḥ praviveke pūrvaṃgamāḥ śikṣāyāṃ tīvragauravāḥ | iyam ucyate agravatī parṣat |

anagravatīṃ ca vaḥ parṣadaṃ deśayiṣyāṃi agravatīṃ ceti me yad uktam idaṃ me tat pratyuktam ||

vyagrāṃ ca vaḥ parṣadaṃ deśayiṣyāmi samagrāṃ ca, tac chṛṇuta sādhu ca suṣṭhu ca manasikuruta bhāṣiṣye |

vyagrā parṣat katamā | yeyaṃ parṣat kalahajātā viharati bhaṇḍanajātā vigṛhitā vivādamāpannā | iyam ucyate vyagrā parṣat |

samagrā parṣat katamā | yeyaṃ parṣat kalahajātā viharati na bhaṇḍanajātā na vigṛhitā na vivādamāpannā | iyam ucyate samagrā parṣat |

vyagrāṃ ca vaḥ parṣadaṃ deśayiṣyāmi samagrāṃ ceti me yad uktam idaṃ me tat pratyuktam ||

uttānāṃ ca vaḥ parṣadaṃ deśayiṣyāmi gaṃbhīrāṃ ca, tac chṛṇuta sādhu ca suṣṭhu ca manasikuruta bhāṣiṣye |

uttānā parṣat katamā | yeyaṃ parṣat uddhatā unnatā capalā mukharā pragalbhā gharṣitasmṛtir asamāhitā ||| | iyam ucyate uttānā parṣat |

gaṃbhīrā parṣat katamā | yeyaṃ parṣad anuddhatā anunnatā acapalā amukharā apragalbhā upasthitasmṛtiḥ samāhitā ||| | iyam ucyate gaṃbhīrā parṣat |

uttānāṃ ca vaḥ parṣadaṃ deśayiṣyāmi gaṃbhīrāṃ ceti me yad uktam idaṃ me tat pratyuktam ||

āmiṣagurukāṃ ca vaḥ parṣadaṃ deśayiṣyāmi dharmagurukāṃ ca, tac chṛṇuta sādhu ca suṣṭhu ca manasikuruta bhāṣiṣye |

āmiṣagurukā parṣat katamā | yathāpīhaikatyā āmiṣahetor anyonyaṃ satkurvanti gurukurvanti māna­yanti pūjayanti te āmiṣam evāntarākṛtvā anyonyaṃ takṣanti saṃtakṣanti saṃparitakṣanti apīdānīṃ kulāny uddāyādāni kurvanti | iyam ucyate āmiṣagurukā parṣat |

dharmagurukā parṣat katamā | yathāpīhaikatyā dharmahetor anyonyaṃ satkurvanti gurukurvanti mānayanti pūjayanti te dharmam evāntarākṛtvā nānyonyaṃ takṣanti saṃtakṣanti saṃparitakṣanti na ca kulāny uddāyādāni kurvanti | iyam ucyate dharmagurukā parṣat |

amiṣagurukāṃ ca vaḥ parṣadaṃ deśayiṣyāmi dharmagurukāṃ ceti me yad uktam idaṃ me tat pratyuktam ||

viṣamāṃ ca vaḥ parṣadaṃ deśayiṣyāmi samāṃ ca, tac chṛṇuta sādhu ca suṣṭhu ca manasikuruta bhāṣiṣye |

viṣamā parṣat katamā | yathāpīhaikatyaḥ adhārmiko bhavaty adharmavādī | tasya parṣad apy adhārmikī adharmavādinī | sa svasyāḥ parṣadaḥ purastāt svaṃ vādam abhūtenātatvenānarthopa­saṃ­hitenācaṣṭe prajñapayati prasthāpayati vibhajati vivṛṇoty uttanīkaroti deśayati saṃprakāśayaty anusandhim api bhāṣate | paravādānāṃ randhrāṇi cchidrāṇi śavalāni kalmāṣāṇy abhūtenātatvenānarthopa­saṃ­hitenācaṣṭe prajñapayati prasthāpayati vibhajati vivṛṇoty uttanīkaroti deśayati saṃprakāśayaty anusandhim api bhāṣate | iyam ucyate viṣamā parṣat |

samā parṣat katamā | yathāpīhaikatyo dhārmiko bhavati dharmavādī | tasya parṣad api dhārmikī dharmavādinī | sa svasyāḥ parṣadaḥ purastāt svaṃ vādam bhūtena tatvenārthopa­saṃ­hitenācaṣṭe prajñapayati prasthāpayati vibhajati vivṛṇoty uttanīkaroti deśayati saṃprakāśayaty anusandhim api bhāṣate | paravādānāṃ randhrāṇi cchidrāṇi śavalāni kalmāṣāṇi bhūtena tatvenārthopasaṃ­hitenācaṣṭe prajñapayati prasthāpayati vibhajati vivṛṇoty uttanīkaroti deśayati saṃprakāśayaty anusandhim api bhāṣate | iyam ucyate samā parṣat |

viṣamāṃ ca vaḥ parṣadaṃ deśayiṣyāmi samāṃ ceti me yad uktam idaṃ me tat pratyuktam ||

anāryāṃ ca vaḥ parṣadaṃ deśayiṣyāmi āryāṃ ca, tac chṛṇuta sādhu ca suṣṭhu ca manasikuruta bhāṣiṣye |

anāryā parṣat katamā | yeyaṃ parṣad idaṃ duḥkham āryasatyam iti yathābhūtaṃ na prajānāty ayaṃ duḥkhasamudayo ’yaṃ duḥkhanirodha iyaṃ duḥkhanirodhagāminī pratipad āryasatyam iti yathābhūtaṃ na prajānāti | iyam ucyate anāryā parṣat |

āryā parṣat katamā | yeyaṃ parṣad idaṃ duḥkham āryasatyam iti yathābhūtaṃ prajānāty ayaṃ duḥkhasamudayo ’yaṃ duḥkhanirodha iyaṃ duḥkhanirodhagāminī pratipad āryasatyam iti yathābhūtaṃ prajānāti | iyam ucyate āryā parṣat |

anāryāṃ ca vaḥ parṣadaṃ deśayiṣyāmi āryāṃ ceti me yad uktam idaṃ me tat pratyuktam ||

etāny eva sapta sūtrāṇi |||

antaroddānaṃ
dharmo vinaya āpattir
gurukā sāvaśeṣā ācīrṇā abhāṣitā apraṇihitā aprajñaptā asamavahatā ||

piṇḍoddānaṃ
saptāviṃśat* ||| yaḥ |
śikṣā vyākhyānataḥ kāryā dharmādharmeṇa paścimaṃ ||

uddānaṃ
saptaviṃśad dharmebhir nava jñānena kārayet |
dṛṣṭiḥ saṃvṛtir ārakṣā kiṃpuruṣaḥ poṣadhena ca ||
||| ttraṃ piṇḍapāta āyācanavastunā ||