Catuṣpariṣatsūtra (2nd)

bodhisattvo bhagavān urubilvāyāṃ vihāraṃ nadyā nairañjanāyāstīre bodhimūle sātatyakārī nipako bodhipākṣikeṣu dharmeṣu bhāvanāyogam anuyuktoviharati |

sa rātryāḥ prathame yāme ṛddhiviṣayaj­ñāna­sākṣīkriyāyā abhijñāyāṃ cittaṃ abhinirnāmayatyan­eka­vidham ṛddhiviṣayaṃ pratyanubhavati |

tadyathā eko bhūtvā bahudhā bhavati |bahudhā bhūtvā eko bhavati |āvirbhavati tirobhāvaṃ jñānadarśanena pratyanubhavati | tiraskuḍyaṃ tiraḥśailaṃ tiraḥprākāram asajyamānaḥ kāyena gacchati tadyathā ākāśe pṛthivyām unmajjananimajjanaṃ karoti tadyathā udake| udake asajyamānaḥ kāyena gacchati tadyathā pṛthivyām | ākāśe paryaṃgena vikramate tadyathā pakṣi śakuniḥ | imāvapi candrasūryau evaṃ mahardhikau evaṃ mahānubhāvau pāṇinā āmārjati parimārjayati yāvad brahmalokādapi kāyena vaśe vartayati |

iti bodhisattvo bhagavān uruvilvāyāṃ viharaṃ nadyā nairañjanāyāstīre bodhimūle sātatyakārī nipako bodhipākṣikeṣū dharmeṣu bhāvanāyogam anuyukto viharaṃ rātryāḥ prathame yāme anekavidham ṛddhiviṣayaṃ pratyanubhavati |

atha bodhisattvo bhagavān uruvilvāyāṃ viharaṃ pūrvavad yāvad anuyukto viharati |

sa rātryāḥ prathame yāme pūrvenivāsānusmṛtij­ñāna­sākṣīkriyāyā abhijñāyāṃ cittam abhinirnāmayati so’nekavidhaṃ pūrvenivāsaṃsamanusmarati |

tadyathaikāṃ jātiṃ dve tisraścatasraḥ yāvad anekānapi saṃvartakalpān samanusmarati |

iti bodhisattvo bhagavāṃ uruvilvāyāṃ viharaṃ nadyā nairañjanāyāstīre bodhimūle sātatyakārī nipako bodhipākṣikeṣu dharmeṣu bhāvanāyogam anuyukto viharaṃ rātryāḥ prathame yāme pūrvenivāsaṃ samanusmarati |

atha bodhisattvo bhagavān uruvilvāyāṃ viharaṃ pūrvavad yāvad anuyukto viharati |

sa rātryā madhyame yāme divyaśrotraj­ñāna­sākṣīkriyāyā abhijñāyāṃ cittam abhinirnāmayati divyena śrotreṇa viśuddhenātikrāṃ­tamānuṣeṇaubhayām śṛṇoti mānuṣāṃśca ye vā dūre ye vāntike |

iti bodhisattvo bhagavān uruvilvāyāṃ viharaṃ nadyā nairañjanāyāstīre bodhimūle sātatyakārī nipako bodhipākṣikeṣu dharmeṣu bhāvanāyogam anuyukto viharaṃ rātryā madhyame yāme divyaśrotrajñānaṃ pratyanubhavati |

atha bodhisattvo bhagavān uruvilvāyāṃ viharaṃ pūrvavad yāvad anuyukto viharati |

sa rātryā madhyame yāme divyacakṣurj­ñāna­sākṣīkriyāyā vidyāyāṃ cittam abhinirnāmayati |

divyena cakṣuṣā viśuddhenātikrāntamānuṣeṇa sattvān paśyati cyavamānānapyupapadyamānānapi suvarṇānapi durvarṇānapi hīnānapi praṇītānapi sugatimapi gacchato durgatimapi yathākarmopagān sattvān yathābhūtaṃ prajānāti |

itīme bhavantaḥ sattvāḥ kāyaduścaritena samanvāgatā vāṅmanoduścaritena samanvāgatā āryāṇām apavādakā mithyādṛṣṭayo mithyādṛṣṭi­karma­dharma­samādānahetostaddhetostatpratyayaṃ kāyasya bhedāt paraṃ maraṇād apāyadurgativinipātam narakeṣūpapadyante |

ime vā punarbhavantaḥ sattvāḥ kāyasucaritena samanvāgatā vāṅmanaḥsucaritena samanvāgatā āryāṇām anapavādakāḥ samyagdṛṣṭayaḥ samya­gdṛṣṭi­karma­dharma­samādānahetostaddhetostatpratyayaṃ kāyasya bhedāt sugatau svargaloke deveṣūpapadyante |

iti bodhisattvo bhagavān urubilvāyāṃ viharaṃ nadyā nairaṃjanāyāstire bodhimūle sātatyakārī nipako bodhipakṣikeṣu dharmeṣu bhāvanāyogama anuyukto viharaṃ rātryā madhyame yāme divyacakṣurjñānaṃ pratyanubhavati|

atha bodhisattvo bhagavān urubilvāyāṃ viharaṃ pūrvavad yavad anuyukto viharati|

sa rātryā paścime yāme cetaḥparyāyajñasākṣikriyāya abhijñāyam cittam abhinirnāmayati|

parasattvānāṃ parapudgalānaṃ vitarkitaṃ vicaritaṃ manasā mānasaṃ yathābhūtaṃ prajānāti|sarāgacittaṃ sarāgaṃ cittam iti yathābhūtaṃ prajānāti|vigatarāgaṃ vigatarāgaṃ iti yathābhūtaṃ prajānāti|sadveṣaṃ vigatadveṣaṃ samoham vigatamohaṃ vikṣiptaṃ saṃkṣiptaṃ līnaṃ pragṛhitam uddhataṃ anuddhataṃ avyupaśāntaṃ vyupaśantaṃ samāhitaṃ asamāhitam abhāvitaṃ bhāvitaṃ avimuktaṃ cittam avimuktaṃ cittaṃ iti yathābhūtaṃ prajānāti|

iti bodhisattvo bhagavān urubilvāyāṃ viharaṃ nadyā nairaṃjanāyāstire bodhimūle sātatyakārī nipako bodhipakṣikeṣu dharmeṣu bhāvanāyogam anuyukto viharaṃ rātryāḥ paścime yāmecetaḥparyāyajñānaṃ pratyanubhavati|

atha bodhisattvo bhagavān urubilvāyāṃ viharaṃ pūrvavad yāvad anuyukto viharati|

sa rātryāḥ paścime yāme āsravakṣayaj­ñāna­sākṣikriyāyā abhijñāyāṃ cittam abhinirnāmayati|

idaṃ duḥkham āryasatyam iti yathābhūtaṃ prajānāti| ayaṃ duḥkhasamudayaḥ| ayaṃ duḥkhanirodhaḥ| iyaṃ duḥkhannirodhagāminī pratipad āryasatyam iti yathābhūtaṃ prajānāti| tasyaivaṃ jānata evaṃ paśyataḥ kāmāsravāccittaṃ vimucyate|bhavāsravād avidyāsravāccittaṃ vimucyate| vimuktasya vimukto’smiīti jñānadarśanaṃ bhavati| kṣīṇā me jātiruṣitaṃ brahmacaryaṃ kṛtaṃ karaṇīyaṃ nāparam asmād bhavaṃ prajānāmīti|

iti bhagavān urubilvayāṃ viharaṃ nadyā nairaṃjanāyāstīre bodhimūle kṛtakṛtyaḥ kṛtakaraṇīyaḥ saṃbuddhabodhis tejodhātuṃ samapannaḥ|