Mahāvastu

84. The Jātaka of Gaṅgapāla

bhūtapūrvaṃ bhikṣavo atīte dhvani nagare vārāṇasyāṃ kāśijanapade dve daridrā dārakā kulmāṣapuṭakāni bhaktaṃ gṛhya kāṣṭhahārakā gacchanti pratyekabuddho ca vārāṇasīṃ piṇḍāya praviśati prāsādikena īryāpathena abhikrāntapratikrāntena ālokitavilokitena saṃ­miṃ­jitaprasā­rita­saṃ­ghāṭī pātracīvaradhāraṇena nāgo pi viya kāritakāraṇo antargatehi indriyehi antargatena mānasena sthitena dharmatāprāptena smṛtaḥ saṃprajāno samāhito ekāgracitto saṃvṛtendriyo avikṣiptadṛṣṭī || te khu taṃ dṛṣṭvā prasādam upasaṃkramanti || te dāni prasannacittā anyonyaṃ evam āhansuḥ || ye kecid dārakā rucchavṛttikā aśanavasanaviprahīnā manuṣyadurgatā manuṣyakṛpaṇā manuṣyavarākā yathā vayaṃ cānye ca sarve edṛśeṣu dvipādakeṣu puṇyakṣetreṣu kuśalamūlāni na kṛtvā ye kecit punar āḍhyā mahādhanā mahābhogā kṣatriyamahāśālā vā brāhmaṇamahāśālā vā anye vā kecit sukhitā sarve te evarūpeṣu dvipādeṣu puṇyakṣetreṣu kuśalāni kṛtvā | yaṃ nūnaṃ vayaṃ imāṃ kulmāṣāṃ imasya ṛṣisya pātreṣu pratiṣṭhāpayema || tehi dāni te kulmāṣā tasya pratyekabuddhasya pātreṣu pratiṣṭhāpitā || pratyekabuddho pi teṣāṃ dārakānāṃ tāṃ bhikṣāṃ pratigṛhya haṃsarājā viya vaihāyasena prakramito || te dārakā taṃ pratyekabuddhaṃ vaihāyasena gacchantaṃ dṛṣṭvā prītisaṃjātā mahābhāgo asmābhiḥ ṛṣiḥ piṇḍapātreṇa pratimānito || te dāni prītisaumanasyajātāḥ praṇidhānaṃ utpādenti || eko āha || ahaṃ anena kuśalamūlena rājā bhaveyaṃ kṣatriyo mūrdhnābhiṣikto || dvitīyo āha || anena kuśalamūlena brāhmaṇamahāśālakule upapadyeyaṃ āḍhyo mahādhano mahābhogo ||

na hi cittaprasannena svalpikā bhavati dakṣiṇā |
tathāgate ca saṃbuddhe ye ca buddhāna śrāvakā ||

sarve kṣayāntā nicayāḥ patanāntāḥ samucchrayāḥ |
saṃyogā viprayogāntā maraṇāntaṃ hi jīvitaṃ ||

te dāni dārakā āyukṣayāc ca karmakṣayāc ca kālagatā samāgatā tatraiva vārāṇasīyaṃ nagare | eko pi rājakule rājño agramahiṣīye upapanno dvitīyo pi purohitakule purohitasya bhāryāye kukṣismiṃ upapanno || kālena samayena rājabhāryā purohitabhāryā ca prajātā | ubhaye dārakā jātā || ubhayeṣāṃ saptāhaṃ ramaṇīyāni jātakarmāṇi kṛtāni saptāhasyātyayena rājaputrasyāpi brahmadatto ti nāma kṛtaṃ purohitaputrasyāpi upako ti nāma kṛtaṃ || anurūpā dhātrī upasthāpitā rājaputro ca purohitaputro ca yathā utpalaṃ vā padumaṃ vā kumudaṃ vā puṇḍarīkaṃ vā tathā saṃvardhanti || yathoktaṃ bhagavatā ||

kṛtapuṇyā hi vardhanti nyagrodhā viya subhūmiyaṃ jātā |
anupanthake viya drumā alpapuṇyā vihīnā tti ||

te dāni yatra kāle vivṛddhā vijñaprāptā saṃjātā tato lipīyaṃ pi sekhiyanti lekhāśilpagaṇanāṃ dhāraṇamudrāṃ || rājaputro pi brahmadatto hastismiṃ aśvasmiṃ dhanusmiṃ tsarusmiṃ dhāvitasmiṃ laṃghite javite iṣvastrajñāneṣu sarvatra gatiṃgato saṃjāto || pitare ca kālagatena brahmadatto kumāro amātyehi vārāṇasyāṃ rājyenābhiṣikto || upako ca māṇavako anyatarāye māṇavikāye sārdhaṃ pratibaddhacitto abhūṣi || so dāni tāye māṇavikāye kasmiṃcid eva sthāne kiṃcit kālaṃ avasādito abhūṣi na taṃ oloketi | vārāṇasīyaṃ ca kaumudī cāturmāsī upasthāpitā sāpi māṇavikā upakasya māṇavakasya bhāvānuraktā pratyāgatā || māṇava kaumudī cāturmāsī upasthitā gandhamālyaṃ me upasthāpehi yathā kaumudī cāturmāsī ramaṇīyaṃ kareyāma || so dāni māṇavako tasyā māṇavikāye śrutvā tuṣṭo āttamano abhūṣi | diṣṭyā me māṇavikā pratyāgatā ti || tasya dāni upakasya māṇavakasya gaṃgākūle māṣa aparasya puruṣasya sakāśāto yācanakaṃ labdhaṃ | so ca naṃ māṣo tatraiva gaṃgākūle gopitako abhūṣi || so dāni tasya māṣasya arthāye vighane madhyāhne vartamāne harṣeṇa madhurāṇi kinnarīya gītāni gāyanto gaṃgākūle [tasya māṣasya arthāye] gacchati ||

adrākṣīd bhikṣavaḥ rājā brahmadatto upariprāsādavaragataḥ upakaṃ māṇavakaṃ madhyāhne vighane madhureṇa svareṇa gāyantaṃ antonagarāto vahirnagaraṃ gacchantaṃ dṛṣṭvā ca punarmasya upake māṇavake premnaṃ nipatitaṃ || yathoktaṃ bhagavatā ||

pūrve vāsanivāsena pratyutpanne hitena vā |
evan taṃ jāyate premnaṃ utpalaṃ vā yathodake ||

yatra mano niviśati cittaṃ vāpi prasīdati |
niṣṭhāṃ paṇḍitā gaccheyuḥ saṃvutthā me purā bhave ||

evaṃ tasya rājño brahmadattasya tatra upake māṇavake saha darśanena premnaṃ nipatitaṃ || tana rājñā brahmadattena upakasya māṇavakasya dūto preṣito || gacchatha yo eṣo māṇavako gāyanto antarnagarāto vahirnagaraṃ gacchati etaṃ ānetha || so tehi gatvā uccati || āgaccha māṇavaka rājā te śabdāpetīti || so dāni tehi rājapuruṣehi rājño sakāśam upanīto || deva ayaṃ so māṇavako ānīto || atha khalu rājā brahmadatto upakaṃ māṇavakaṃ gāthāye adhyabhāṣe ||

madhyantike vītinate kukkulavattato mahī |
atha gāyasi vaktrāṇi na tāpayati ātapo ||

upari tapati ādityo heṣṭā tapati vālikā |
udagracitto sumano atha vaktrāṇi gāyasi ||

atha khalu bhikṣavaḥ upako māṇavako rājānaṃ brahmadattaṃ gāthāye pratyabhāṣe ||

na ātapo tāpayati antakā tāpayanti māṃ |
antakāś ca vighātāś ca te tāpenti na ātapo ||

itvaraṃ khu ayaṃ tāpo yo khu kāyaṃ pratāpaye |
kāryā nāma vivādā ca te tāpenti na ātapo ||

rājā dāni brahmadatto upakaṃ māṇavakaṃ gāthāye pratyabhāṣati ||

kin te janeti saṃkṣobhaṃ ayaṃ kena pratapyati |
tāpena pīḍito kāyo taṃ tvaṃ ākhyāhi pṛcchito ||

atha khalu bhikṣavo upako māṇavako rājānaṃ brahmadattaṃ gāthāye pratyabhāṣati ||

vṛṣalī deva kāntā me kuṃbhadāsī ariṃdama |
tasyā upasthito sarvo tayāsmi upatāpito ||

atha bhiksavo rājā brahmadatto upakaṃ māṇavakaṃ āmantrayati || kahiṃ māṇavaka gamiṣyasīti || atha khalu bhikṣavaḥ upako māṇavako rājānaṃ brahmadattaṃ gāthāye pratyabhāṣati ||

māṣo me yācanālabdho gaṃgātīrasmiṃ gopito |
purastime nagarasya tadarthāya vrajāmy ahaṃ ||

atha khalu bhikṣavo rājā brahmadatto upakaṃ māṇavakaṃ āmantrayati || āgamehi tāvat* māṇavaka muhūrtaṃ śītalake gamiṣyasi || atha khalu upako māṇavako rājānaṃ brahmadattaṃ gāthāye pratyabhāṣe ||

yehi artho ayānasya ūrdhvaṃ tiṣṭhanti tiṣṭhato |
yāne tu vahyamānasya purato dhāvanti dhāvato |
gaṃsāmy ahaṃ mahārāja tasya māṣasya kāraṇā ||

(atha khalu rājā brahmadatto upakaṃ māṇavakaṃ gāthāye pratyabhāṣe)

sace te artho māṣeṇa ahaṃ māṣaṃ dadāmi te |
karohi kṛtyaṃ māṣeṇa uṣṇe māṇava mā vraja ||

upako māṇavako āha || yadi vedo māṣaṃ dāsyati etaṃ dvitīyaṃ māṣaṃ etehi māṣehi tuṣṭā bhave pi vṛṣalī kaumudīyaṃ ca avighnaṃ bhaviṣyati || atha khalu upako māṇavako rājānaṃ brahmadattaṃ gāthāye adhyabhāṣe ||

yaṃ ca māṣaṃ devo dadyāt taṃ dvitīyaṃ bhaviṣyati |
etehi dvīhi māṣehi tuṣṭā sā vṛṣalī bhave ||

rājā āha || ahan te māṇava duve māṣāṇi dāsyāmi mā ca uṣṇena pacyanto gacchāhi || rājā brahmadatto upakaṃ māṇavakaṃ gāthāye adhyabhāṣe ||

sace te artho māṣehi duve māṣā dadāmi te |
karohi kṛtyaṃ māṣehi uṣṇe māṇava mā vraja ||

upako āha || ete ca dve māṣā taṃ ca tṛtīyaṃ bhaviṣyati āmantraṇaṃ ca bhaviṣyati | evaṃ vṛṣalīye ramaṇīyaṃ kaumudikaṃ bhaviṣyati ||

bhavataś ca duve māṣā taṃ tṛtīyaṃ bhaviṣyati |
etehi trīhi māṣehi tuṣṭā sā vṛṣalī bhave ||

rājā brahmadatto upakaṃ māṇavakaṃ evam āha || māṇavaka uṣṇe mā gacchāhi ahaṃ te trayo māṣāṃ dāsyāmīti |

sace te artho māṣehi bhūyo māṣāṃ dadāmi te |
karohi kṛtyaṃ māṣehi uṣṇe māṇava mā vraja ||

māṇavako āha || deva etāni va trayo māṣā taṃ caturthaṃ bhaviṣyati āmantraṇaṃ tatra bhūyo bhaviṣyati | evaṃ vṛṣalikāye sārdhaṃ ramaṇī kaumudīyaṃ bhaviṣyati ||

bhavataś ca trayo māṣā taṃ caturthaṃ bhaviṣyati |
caturhi deva māṣehi udagrā vṛṣalī bhave ||

etena krameṇa rājā brahmadatto śatasahasraṃ upakasya māṇvakasya deti taṃ ca māṣaṃ na muṃcati | yāvad aparārdhena tato māṣāto na nivartito || tena dāni rājñā brahmadattena ardharājyaṃ tasya upakasya māṇavakasya dinnaṃ | antaḥpurāto ardhaṃ dinnaṃ | kośakoṣṭhāgārāṇāṃ pi dinnam ardham amātyabhaṭṭabalāgrāṇāṃ pi ardhaṃ dinnaṃ ||

te dāni ubhaye rājyaṃ kārayanti | ubhau arthāni samanuśāsanti || so dāni māṇavako paṃcahi kāmaguṇehi samarpito krīḍati ramati paricārayati || so dāni rājā brahmadatto atyarthaṃ atīva upakasya māṇavakasya santike viśvasto yadi kahiṃci pi gacchati tataḥ upakasya māṇavakasya utsaṃge śīrṣaṃ dattvā śayati || tasya dāni upakasya rājñā śayitena etad abhūṣi || kathaṃ ekarājyena duve rājāno yaṃ nūnāhaṃ imaṃ rājānaṃ brahmadattaṃ ghātetvā aham eva eko rājā bhaveyan ti || tasya dāni bhūyo etad abhūṣi | na etad mama sādhu bhaveya na pratirūpaṃ yam ahaṃ rājño brahmadattasya kṛtajñasya akṛtajño bhaveyaṃ || dvitīyaṃ tṛtīyakaṃ pi etad abhūṣi | na etaṃ sādhu bhaveya na pratirūpaṃ yaṃ eke rājye duve rājāno yaṃ nūnāhaṃ rājānaṃ brahmadattaṃ jīvitāto vyavaropayitvā aham eva eko kāśirājā bhaveyaṃ ti || tasya dāni dvitīyakaṃ tṛtīyakaṃ pi etad abhūṣi | na etaṃ mama sādhu bhaveya na pratirūpaṃ yaṃ ahaṃ rājño brahmadattasya kṛtajñasya akṛtajño bhaveyanm ti || so dāni avidhāvidhan ti pravrajito tena rājā brahmadatto pratibuddho || so taṃ āha || upaka avidhāvidhan ti vakṣi || so dāni āha || evaṃrūpo me deva citto abhūṣi | yaṃ nūnāhaṃ brahmadattaṃ jīvitāto vyavaropayitvā aham eva eko kāśirājā bhaveyaṃ ti || tasya so brahmadatto rājā na pattīyati || so dāni upako āha || evam etaṃ deva yathā taṃ jalpāmīti || atha khalu rājā brahmadatto upakaṃ māṇavakaṃ gāthāye adhyabhāṣe ||

dinno me ardharājyaṃ te stokastokena māṇava |
ekaṃ muṃcasi na māṣaṃ kathaṃ anto bhaviṣyati ||

atha khalu upako māṇavako rājānaṃ brahmadattaṃ gāthāye pratyabhāṣe ||

na hi anto anantāye tṛṣṇāye iha vidyati |
pravrajiṣyāmy ahaṃ rājan na rājyena rato smi ca ||

bahūhi kāmehi alaṃ me yehi bālo na tṛpyati |
alaṃ me sarvakāmehi pravrajiṣyāmi nagāriyaṃ ||

kāma jānāmi te mūlaṃ saṃkalpāt kāma jāyase |
na kāmaṃ kalpayiṣyāmi tato me na bhaviṣyasi ||

alpeṣu bālo kāmeṣu bahūṣv api na tṛpyati |
apahāya sarvakāmāni pratibuddho va paśyati ||

icchāmi dānaṃ prabhavanti ca te
icchā praśāntā ca na bhonti evaṃ |
etaṃ va icchāya phalaṃ viditvā
na prārthaye putrapaśuṃ dhanaṃ ca ||

atha khalu upako māṇavako brahmadattaṃ rājānam etad uvāca || anujānāhi me deva pravrajiṣyāmi || rājā āha || mā pravrajāhīti sahitā rājyaṃ kārayiṣyāmaḥ || upako āha || na mahārāja rājyena artho anujānāhi me pravrajiṣyāmi || so dāni rājñā brahmadattena anujñāto yadi evaṃ abhiprāyo pravrajāhīti ||

tahiṃ dāni kāśiṣu uttareṇa kumbhakārasya pravrajitasya ṛṣisya paṃcābhijñasya āśramapadaṃ || so dāni upako māṇavako tam āśramapadaṃ gatvā tasya kumbhakārasya pravrajitasya ṛṣisya sakāśāto pravrajito || tena dāni pūrvarātrāpararātreṇa jāgarikāyogam anuyuktena viharantena yujyantena ghaṭantena vyāyamantena catvāri dhyānāni utpāditāni maharddhiko mahānubhāvo ṛṣī saṃjāto candramaṇḍalaṃ sūryamaṇḍalaṃ āśrame paryaṃkena niṣaṇṇo pāṇinā parimārjati parāmṛṣati yāvad brahmalokaṃ kāyena vaśe varteti || atha khalu rājā brahmadatto upakasya māṇavakasya spṛhayanto abhīkṣṇaṃ imāṃ gāthāṃ bhāṣati ||

alpasya imaṃ mahāvipāko
upako adhyagame mahāntam arthaṃ |
sulabdha lābhā khalu māṇavasya
yo pravraje kāmaratiṃ prahāya ||

rājño brahmadattasya antaḥpurikā punarpunaḥ imāṃ gāthāṃ rājño brahmadattasya sakāśāto śṛṇvanti na cāsyārthaṃ vijānanti || tasya dāni rājño brahmadattasya gaṃgapālo nāma kalpako | rājño brahmadattasya sa viśvasto yathāsukhaṃ antaḥpuraṃ praviśati upasthānakaro || so dāni rājñā brahmadattena uktaḥ || gaṃgapālaka keśaśmaśruṃ me karohīti || evaṃ vaditvā osupto || tena tasya śayitasya keśaśmaśru kṛtaṃ rājāpi vibuddhitvā āha || gaṃgapāla āgaccha karohi me keśakarmaṃ || gaṃgapālo āha || kṛtaṃ te deva keśaśmaśruṃ śayitasya || so dāni gaṃgapālo ādarśakaṃ gṛhya rājño brahmadattasya allīno nidhyāyatu devo ti | rājā ādarśakena keśaśmaśru nidhyāyanto gaṃgapālasya kalpakasya prīto saṃvṛtto || rājā āha || gaṃgapāla tuṣṭo smi tava etena śilpena abhirāddho grāmavareṇa pravareṇa pravāremi gṛhṇa grāmaṃ sayadi icchasi || so dāni āha || yāvat saṃmantremi tato devasya sakāśāto grāmavaraṃ graheṣyāmīti || so dāni gaṃgapālo rājño brahmadattasya antaḥpurikānāṃ ācikṣati || adya mayā rājā brahmadatto śilpena ārādhito grāmavareṇa cāhaṃ pravārito gṛhṇāmi grāmavaran ti ||

antaḥpurikā āhansuḥ || marṣehi grāmavaraṃ eṣo rājā abhīkṣṇam imāṃ gāthāṃ bhāṣati ||

alpasya imaṃ mahāvipāko
upako adhyagame mahāntam arthaṃ |
sulabdha lābhā khalu māṇavasya
yo pravraje kāmaratiṃ prahāya ||

vayaṃ ca etāye gāthāye arthaṃ na vijānāmatha | tato gaccha rājānaṃ brahmadattaṃ jalpāhīti alaṃ me deva grāmavareṇa yaṃ devo abhīkṣṇaṃ imāṃ gāthāṃ bhāṣati ||

alpasya imaṃ mahāvipāko
upako adhyagame mahāntam arthaṃ |
sulabdha lābhā khalu māṇavasya
yo pravrajet kāmaratiṃ prahāya ||

etasya me mahārāja arthaṃ ācikṣāhīti || so dāni gaṃgapālo rājño brahmadattasya upasaṃkramitvā āha || deva alaṃ me grāmavareṇa yaṃ devo abhīkṣṇaṃ imāṃ gāthāṃ bhāṣati ||

alpasya imaṃ mahāvipāko
upako adhyagame mahāntam arthaṃ |
sulabdha lābhā khalu māṇavasya
yo pravrajet kāmaratiṃ prahāya ||

imasyā deva gāthāye artham ākhyāhi || etaṃ me varaṃ bhavatu || rājā āha

|| upako māṇavako ardharājyam apahāya kāmeṣu ādīnavaṃ dṛṣṭvā ṛṣipravrajyāṃ pravrajito so ca paṃcāhijño mahābhāgo ṛṣi saṃvṛtto ahaṃ ca kāmeṣu pramatto | so haṃ tasya upakasya māṇavakasya spṛhayanto abhīkṣṇaṃ etāṃ gāthāṃ bhāṣāmi || so dāni gaṃgapālo rājño śrutvā antaḥpuraṃ praviśitvā antaḥpurikān āśvāseti || tasya mā utkaṇṭhatha na rājā pravrajiṣyati | tasya upakasya māṇavakasya spṛhayanto rājā abhīkṣṇaṃ etāṃ gāthāṃ bhāṣati || idānīṃ antaḥpurikā hṛṣṭā tuṣṭā āttamanā hiraṇyasya suvarṇasya ca vastrābharaṇānāṃ ca mahāntaṃ rāśiṃ kṛtvā gaṃgapālam āhansuḥ || gaṃgapāla idan te abhicchādaṃ bhavatūti || tasya dāni gaṃgapālasya etad abhūṣi || so ca nāma upako māṇavako āḍhyo gṛham apahāya pravrajitaḥ kiṃ punar mayā na pravrajitavyaṃ bhaveya | yaṃ nūnāhaṃ pi pravrajeyaṃ kiṃ me pareṣāṃ cittena kāryaṃ || so dāni antaḥpurikā āha || alaṃ me tena hariṇyasuvarṇena ahaṃ pi pravrajiṣyāmi || so dāni brahmadattasya upasaṃkramitvā āha || deva anujānāhi me pravrajiṣyāmi iti || rājā āha || kasya santike pravrajiṣyasi || so āha || upakasya ṛṣisya santike pravrajiṣyāmi || rājā āha || anujānāmi pravrajāhīti ||

so dāni gaṃgapālo upakasyāśramaṃ gatvā pravrajito || tenāpi pūrvarātrāpararātraṃ jāgarikāyogam anuyuktena viharantena yujyantena ghaṭantena vyāyamantena catvāri dhyānāni niṣpāditāni paṃcābhijñā sākṣīkṛtā cand­ramaṇ­ḍalasūrya­maṇḍala­pari­mārjako ṛṣi saṃvṛtto || aśroṣīd bhikṣavo rājā brahmadatto sarve te trayo ṛṣayo paṃcābhijñā saṃvṛttā te maharddhikā mahānubhāvā | tasya dāni teṣāṃ ṛṣīṇāṃ darśanakāmatā udapāsi || so dāni amātyapāriṣadyān āmantrayati || gacchāma teṣāṃ ṛṣīṇāṃ darśanāya kumbhakārasya pravrajitasya ca upakasya ca gaṃgapālasya cāśramaṃ sarve te trayo ṛṣayo caturdhyānalābhī paṃcābhijñā maharddhikā mahānubhāvā ti | so kālo tathārūpāṇāṃ dakṣiṇeyānām darśanāyopasaṃkramaṇāya paryupāsanāya || amātyapāriṣadyā āhansuḥ || mā devo teṣāṃ sakāśaṃ gacchatu te nāma iha ānayitavyā || [so dāni gaṃgapālo rājño brahmadattasya āmravanaṃ gato nāpitabhāṇḍaṃ olaṃbayitvā pravrajito || atha khalu anyataro rājāmātyo rājānaṃ brahmadattaṃ gāthāye adhyabhāṣe ||

ayam eva so āmravano brahmadattasya śrīmato |
yatra kṣuraṃ ca bhāṇḍaṃ ca olaṃbitvā pravrajito ||

na devena hīnajātyānāṃ sakāśaṃ gantavyaṃ ti | tehi nāma devasya sakāśam āgantavyaṃ || rājā āha || na eṣa dharmo yaṃ dakṣiṇeyā vuccensuḥ iha āgacchatha rājānaṃ darśanāyeti | asmābhiḥ tatra gantavyaṃ ṛṣayo darśanāya || atha khalu rājā brahmadatto kumārāmātyasaṃparivṛto yena te ṛṣayas tenopasaṃkrame || atha khalu gaṃgapālo ṛṣir yena rājā brahmadattas tenopasaṃkramitvā rājānaṃ brahmadattam etad uvāca || svāgataṃ rājño brahmadattasya niṣīdatu rājā brahmadatto || atha khalu rājño brahmadattasya amātyapāriṣadyā gaṃgapālaṃ ṛṣiṃ vācāye santarjayensuḥ sacchambitaṃ karensuḥ || kiṃ vadesi tvaṃ gaṃgapāla hīnajātyo samāno rājānaṃ brahmadattaṃ nāmena samudācarasi || atha khalu rājā brahmadatto tāṃ amātyapāriṣadyāṃ gāthāye adhyabhāṣe ||

mā kiṃci vadatha gaṃgapālaṃ
munināṃ maunapadehi śikṣamāṇaṃ |
eṣo atare tam arṇavoghaṃ
yaṃ taritvāna bhavanti vītarāgāḥ ||

tapasā prajahanti pāpakāni
tapasā vidhamanti andhakāraṃ |
bhāvan tapasā abhibhūya gaṃgapālo
nāmena abhibhāṣe brahmadattaṃ ||

sāṃdṛṣṭikaṃ paśyatha yāvad evaṃ
kṣāntisaurabhyasyidaṃ vipākaṃ |
lokasya sadevakasya pravrajyaṃ
devāna manujāna vandanīyaṃ ||

atha khalu rājā brahmadatto sārdhaṃ amātyapāriṣadyehi teṣāṃ ṛṣīṇāṃ pādau śirasā vanditvā ekānte niṣīde ||

tasya dāni gaṃgapālasya yā gṛhasthabhūtasya bhāryā abhūṣi sāpi pativratā anyaṃ puruṣaṃ manasāpi na prārthayati || tasyā gaṃgapālo jijñāsanārthaṃ divyena rūpeṇa nirmitena suvarṇabhājanam ādāya upasaṃkramya pralobhayati imaṃ sauvarṇaṃ bhājanaṃ gṛhṇāhi mayā sārdhaṃ paricārehi || sā dāni āha || na hi pativratā ahan ti ||

so dāni devaputro taṃ divasaṃ pratyācikṣito aparaṃ divasaṃ rūpyabhājanam ādāya upasaṃkrānto imaṃ rūpyabhājanaṃ pratigṛhṇāhi mayā ca sārdhaṃ paricārehi || sā dāni āha || na hi pativratā ahan ti || taṃ pi divasaṃ pratyācikṣito aparaṃ divasaṃ kāṃsabhājanam ādāya upasaṃkrame imaṃ kāṃsabhājanaṃ pratigṛhṇāhi mayāpi sārdhaṃ pravicārehi || atha khalu sā nārī taṃ devaputraṃ gāthāye dhyabhāṣe ||

nārī naro jihmaye vāraṇena
utkarṣaye yatra karoti cchandaṃ |
vipratyanīkaṃ khalu devatānāṃ
pratyākhyāto alpatareṇa eṣa ||

atha khalu devaputro tāṃ nārīṃ gāthāye pratyabhāṣe ||

āyuṃ ca varṇaṃ ca manuṣyaloke
prahīyate manujānāṃ sugātrī |
tenaiva varṇena dhanaṃ pi arjyaṃ
parihīyase jīrṇatarāsi adya ||

bhagavān āha || syāt khalu punar bhikṣavaḥ yuṣmākam evam asyād anyaḥ sa tena kālena tena samayena upako nāma ṛṣi abhūṣi | na khalv etad evaṃ draṣṭavyaṃ | tat kasya hetoḥ | ahaṃ sa upako nāma tadā ṛṣi abhū || nānyaḥ sa brahmadattarājā | eṣa śuddhodanas tadā brahmadatto kāśirājā abhūṣi || nānyo bhikṣavas tadā gaṃgapālo nāma nāpito ṛṣipravrajito bhūd eṣa upālis tadāpi etasya hīnajātyasya mama āgamya sarājikāya pariṣāya pādā vanditā etarahiṃ pi etasya hīnajātyasya mamāgamya sarājikāya pariṣāya pādā vanditā ||

samāptaṃ upāligaṃgapālānāṃ jātakaṃ ||